Toatele leoleo ua faamalolo i le sasi ona fai o galuega

O le masina o Oketopa na iloga lava le tele o mataupu na fesiligia ma faitioina ai le auaunaga a le Matagaluega o Leoleo ma Falepuipui. O faitioga ua masani ai ae ua pei ua faatuputupulaia ma o lea ua maua e le tatou nusipepa ua toatele lava foi alii ma tamaitai leoleo ua faatea ona o nisi o gaioiga ua manatu le pulega ua lē talafeagai ma le auaunaga aemaise o le silasila a le atunuu.

O le tasi o tamaitai na toe laga foi le suafa i suesuega faalotoifale a le Matagaluega, ua tuua‘ia i le lavea ai o le taavale a leoleo i le mae‘a ai lava o le fono a le SIDS ia Aukuso. Sa suesueina la pe faamata na faasuaavā i le faafoeina o le taavale pe leai.

O le tamaitai foi lea na laga le suafa i le fai o ni upu mamafa faasaga i se tamaitai na tuua‘ia e leoleo i le taufaavalea ae uma ane toe tatala i tua tagi a tagata na faapea ona faia faasaga ia te ia.
O le isi alii na lavea talu ai nei foi le isi taavale a leoleo ua faamalolo mo se taimi ae fai i ai suesuega a Leoleo. O le isi satini sinia ua faamalolo mo se vaitaimi ona o le mataupu lea na laga e se tamaitai faapea ua faaoolima le leoleo ia te ia. Faaalia e le alii leoleo o feeseeseaiga lava i totonu o le aiga ae e lē o luga o le galuega petai o le lipoti a lea tamaitai ua agai i le Toomaga mo ē Puapuagatia o ia na matuā fasi lelei lava e le avetaavale.

O isi alii leoleo e toafā na faamalolo ona o le ioe e loka le tamaitiiti e tolu tausaga faatasi ma lona tamā lea na tuua‘ia i lona avetaavale i se taavale e lei lesitalaina ma e lei laisenea foi. O le taofia faatasi la o le tamā ma lona atalii laitiiti lea i le potu taofia o leoleo i Apia lea la ua aafia ai nei ma ia leoleo.

O lea gaioiga na faatoese ai le Sui Komesina o Leoleo i luga o ualesi faasalalau ona o le manatu e lē tatau lava ona taofia se tamaitiiti i se vaavaaiga a leoleo aemaise i potu taofia ua na o tagata matutua e tatau ona taofia ai. Sa iai se faamatalaga faapea ua sauni Leuluaialii Olinda Woodroffe e ave leoleo i le tulafono ona o lea gaioiga ma o loo talia lea laasaga i lea foi mataupu peitai ua faamalolo alii leoleo e toafā ona o lea gaioiga.

O loo talia lava i le taimi lenei poo ai o le a tofia i le Komesina o Leoleo ona o lea e avanoa lava le tofiga lea sa umia e le Afioga Lilomaiava Fou Taioalo ae o le taimi lenei o loo auai lava Komesina Lagolago o le Matagaluega e ave lea tofiga.