O loo siitia pea le maualuga o taumafaiga o alo ma fanau i totonu o aoga tulagalua ona o le sao ma galuega a faiaoga Samoa aemaise o mātua o loo galulue i totonu o aoga i le aoaoina o le gagana Samao aemaise o le faailoina o ana measina.
O le Aso Lulu ua mavae na silasila ma maimoa ai mātua i taumafaiga a alo Samoa i totonu o le aoga a Robertson Rd Primary School i le tapenaina o lauga aemaise lava i tala faatino.
E fā vaega na vaevaeina i ai le tauvaga, o le Tausaga 5, Tausaga 6, Tausaga 7 ma le Tausaga 8. O le susuga ia Papalii Lafulafu Peo na ia faamasinoina le tauvaga. O le alii o Joseph Aiolupo na sili i le Tausaga 5, o le tamaitai o Alofa Peni na sola ma le manumalo o le Tausaga 6, o Jane Faasavalu na suipi i le tauvaga a le Tausaga 7, ma le Tausaga 8 na vivini ai le toa a le alii o Siaunuua Lagaaia.
Na taualuga le polokalame a le fanau i le tala Samoa na latou faatinoina ia Tui ma Tui ma o laua mātua ia Tapitofau ma Ogafau. Sa telē se sao o alo ma fanau o le aoga a Robertson Rd aemaise o mātua i le faatāuaina o lenei Vaiaso o le Gagana Samoa i Aukilani.
