O le tau amataina mai o le Senakolo poo le Divine Mercy a Inala, sa taumate pe o le a iai se taimi e ono malamagia ai le sulu mu itititi, ae ese le manaia o le fusia i le loto e tasi ma le fealofani o le fanau a le Atua.
Na faavaeina mai i le na o le 5 aiga i le 2010 ae o le alaga fiafia o lea ua 15 matafale. O le auga lava o lenei mafutaga, o le fefaasoaai o le tasi ma faamalosi le tasi i le tasi i afioga mamana a le Atua.
E tasi le loto e fai fiafia galuega e mafuta foi i le agaga faa-Kerisiano ae o le sini o na mea uma ia vavalalata le mafutaga ma le Atua.
O le Aso Toonai la na tea nei na valaaulia ai nisi o tauaiga, uo ma ē masani i se fiafia e mafuta ai ma molimoli ai se taulaga faafetai i le Atua auā o lea ua aulia le 5 tausaga o le Divine Mercy a Inala.
Na amataina i le Misasa paia na osia e Father Stephen o le Palisi a Inala. O le talaaga logo mālie o le savaliga mai le 5 tausaga sa faapea ona fofogaina e le Peresetene o le Senakolo, le tofa ia Seumanu Ana Tenisio.
O le fofoga o le aso ole tofa ia Tolu Pisa Iulio, ae fai ma sui o le auvalaaulia le tofa ia Sauafu Silao e momoli le agaga faafetai i le matagofie o tapena o le faamoemoe.
Nofoatoo o le Divine Mercy poo le Senakolo a Inala:
Peresetene: Seumanu Ana Tenisio
Sui Peresetene – Tolu Pisa Iulio
Failautusi – Loreta Tavu‘i
Teutupe – Rosalia Fenandez
