Ua mae‘a nei ona logoina Pulenuu o Alalafaga ua faamanuiaina i lalo o le Poloketi a le USPEUGCCA i totonu i Samoa. O le filifiliina o Nuu ma alafaga e galueaina ai lenei poloketi sa faatautaia e le komiti faafoe o lenei poloketi i totonu o Samoa. Mai le 12 o nuu sa pasiaina mo le asiasia, ua filifilia mai ai le 6 alalafaga mo lenei faamoemoe.
O alalafaga e ono ua faamanuiaina e iai Falealupo, Auala Asau, Manase, Sapapalii i Savaii ma Faleseela i Upolu.
E valu ni sui o le komiti ua filifilia mo le galuega i Savaii e le gata i le Faafeiloai atu i Nuu ma alafaga ua lautogia ae o le a faapea ona faatautaia se galuega suesue atili e ala atu i ni fesili saunia lelei e manaomia ai le lagolago ma le taliina o nei fesili suesue i se tulaga matalia mo le faafoeina o Fuafuaga alu mamao a le alalafaga.
O sui auai mai le komiti faafoe po’o le National Project Advisory Committee e toavalu ua lautogia e faamoemoe e faatautai tulaga i le suiga o le tau i totonu nuu poo silafia e nuu lo latou aafiaga pe leai, po ua silafia foi ae leai se naunautaiga e faafetaui atu i suiga matuia ua iai le tau i totonu o Samoa e ala i le silasila i meataumafa, o le ola o meaola, vaomatua, o le vai taumafa, aafiaga o le gataifale ma le faaletonu o le soifua lelei e ala i le ‘ona o namu ma isi iniseti faalafua. E atoa le vaiaso o le polokalame i Savaii ma e tasi le nuu i le aso e faatautaia ai lenei faatalatalanoaga ma alalafaga seia pāia le afiafi ina ua mānava atu nisi o le alafaga sa faigaluega.
O nei sailiiliga e ala i le faatalatalanoaina o sui o alafaga poo vaega eseese o le alalafaga e faatatau i le suiga o le tau poo le Climate Change o le a maua mai ai se auivi e saunia ai se fuafuaga poo se PLAN mo le alalafaga latou e faatautaia ai e i latou lava ia le galuega fesootai atu i le Suiga o le Tau e faavae i luga o latou manatu ma lagona sa faaalia ma o latou foi e ona lea Fuafuaga poo le Plan. O le tele o mataupu o le a ta‘ua i lea fuafuaga e fiafia le Poloketi a le USPEUGCCA e faatupeina.
E tolu ni alalafaga faapitoa e ta‘ua o Demonstration Sites e faia ai faataitaiga talafeagai e faaogaina ai le fanau aoga mo faailoga lautogia e iai le Masters PhD ma le Post Grad Diploma e faavae ai latou suesuega i le suiga o le tau. E iai le naunautaiga o lenei poloketi a saunia lelei mea uma. E iai le faamoemoe o le a avea nei alalafaga ma alalalafaga e fai ma faataitaiga lelei mo isi alalafaga e lē gata i Samoa nei ae faapena foi le Pasefika ma isi Nuu o Aferika.
O sui auai mo lenei faamoemoe i Savaii, o Jasmine Sila ma Peseta Frank Fong o le Ofisa o faatoaga, Peseta Mulinuu Su‘a o le Ofisa o Pulenuu, Fata Sunny Seuseu o le MNRE, Tamaso Saivaise o le MESC, Tamati Fau o le NHS, Vasilifiti Moelagi Jackson Taitaifono o le Poloketi mai le SUNGO ma Tapulolou Siuli Tuailemafua o loo faatautaia le Poloketi i totonu o Samoa.
E toatasi se sui mai le malo tele o Fiti o le a faatautaia le tulaga i le Fuafuaga Talafeagai (Adaptation Plan) mo nuu taitasi. O le aso 8 Tesema o le a toe taliu mai ai i Upolu ona tuutuulaau atu ai lea i Faleseela i le Aso Gafua 10 Tesema 2012.
