Ua oo foi i le taimi o le tausaga e feagai ai le Komiti o le Welfare a le Aiga Samoa i Logan City ma a latou asiasiga faaiu o le tausaga, e pei ona faataunuu ai i le faaiuga o le vaiaso talu ai, Aso Toonai, 1 Tesema.
O lea asiasia lea na toe asia uma ai totonu o maota ma laoa o aiga taitasi i vaega tau meaai taumafa, e matele lava i meaai tuu apa ma isi oloa eseese mo kuka, tagata araisa, taga suka, tagata masina ma isi lava oloa eseese, e faasauni ai ma tapena mo taimi ua mae‘a galuega ma sauniuni ai foi mo ni aso leaga e pei ona masani ai ma faagasolo mai ia Ianuari i le amataga o le tausaga nei.
Na taualuga i le paka i Logan lea mo le taumafataga na saunia lava e le Komiti o Gaioiga faapea le paia ma le mamalu o le Aiga Samoa i Logan. O le susuga ia Fitu Fenunuti na saunia le lipoti o le asiasiga, lea na ia ta‘ua ai le matuā lava saunia o aiga taitasi i welfare mai le amataga o le tausaga.
E tele aiga ua mautu potu faapitoa e tuu i ai welfare, ma na matuā maofa i le leai o ni vaega o potu faapitoa e gaogao ua faatumulia uma i oloa eseese auā le sauni atu mo taimi ma aso faigata ae o lava tapena aiga uma.
O le tofa ia Samoata Peleti sa fetalai e faafetaia le komiti ia latou galuega mae‘ae‘a o lenei tausaga.
O le masina o Ianuari o le a toe amataina ai asiasiga o welfare masani a le Aiga Samoa i Logan mo le tausaga 2013 ma e iai le talitonuga e avea foi lenei tulaga e fai ma faamanatu ua oo foi i le taimi e amata faatau ai taumafa tuuapa ma oloa siiatoa pe afai o le a umi se taimi e malolo ai galuega ae leai se popole i tulaga tau faatau.
O le Peresetene o le Aiga Samoa o le susuga ia Mataafā Tareta Hakula ma le faletua ia Anne Siakisini.
