O Seiuli Allan Alo, o lona lava fiafiaga ua iu lava ina aoga ma maua ai ona faailoga, o le faalauiloa lea o le taleni o le siva, lea ua ia tuufaatasia ai siva faapapalagi ma soo se ituaiga siva o le Pasefika, o le faataupati, o le sasa, o le mauluulu, ua ia tuufaatasia i nisi o faafiafiaga ua tele ina unaia nei i le Pasefika.
O lea la ua galue lenei alii i se laasaga tele o le tomai faatufugaga i aoaoga a le Iunivesite o le Pasefika i Saute (USP) ma ua faamautu faavaitaimi i Alafua.
O lea ua atoa le lua masina o faatautaia faatalatalanoaga, o fesootaiga ma feutagaiga ma atumotu o le Pasefika ina ia mafai ai ona aoina mai tomai eseese o galuega taulima, o siva, fagogo, o fatuga o pese ma tomai e tuufaatasia ai mamanu a nei atumotu mo polokalame faaleaoaoga a le Iunivesite.
Faaalia e Seiuli le tele o le manaoga ina ia aoao lelei manogi nei o le lolo ona o le taimi lenei e le o tuufaatasia i ni auala e faamaumauina ai nei tomai ma o le mafuaaga lea o le vaavaai o le Iunivesite ina ia faamautu ai nei aoaoga.
O le tele o tomai ua tuugutu ma ua tuufaasolo mai i lea augatupulaga i lea augatupulaga e pei ona taua e Seiuli ma ua manaomia lava le tele o le galuega ina ia mafai ai ona maua nei faamaumauga uma i le isi senituri o lumanai.
O le vaiaso na tea nei na valaauina ai le toatele o tusi ata, o i latou o loo ua lauiloa i galuega taulima ma isi tomai faatufugaga i Samoa aua lava le aoina o nei tomai eseese.
Ua malaga foi Seiuli ma nisi o lenei mataupu i atumotu eseese o le Pasefika ina ia mafai ai ona aoina mai o latou foi tomai mo le aoaoina o lea mataupu i le Iunivesite. “Talosia ae tele se mea aoga e maua mai i ia sailiiliga ona mafai loa lea ona tuufaatasia o lenei mataupu i se tulaga maualuga aua o le a aofia uma atunuu o le Pasefika i lenei taumafaiga,” o se faaaliga lea a Seiuli.
“O le taua ia o le taumafai e tuufaatasi tomai eseese nei o le Pasefika aemaise foi i tomai o tu ma aga faa-Samoa, ua tele auala e faatino ai ma ua iai suiga ae a faamaumau lava nofoaga ma auala na muai maua mai ai nei tomai, o le a umi se taimi e mafai ona faaaoga ai e tupulaga i le lumanai”.
O faaaliga o le tulaga ua iai nei aoaoga na faatautaia lava i le feiloaiga lea na faia i le Millenium Hotel i le vaiaso na tea nei. O le ausiva ua vaaia le toatele o fanau a le Pasefika ua sisiva ai, na faatautaia ni a latou faafiafiaga.
O Allan Alo o loo ia faatautaia aoaoga i le Nofoaga tutotonu o tomai faatufugaga i Suva i Fiti ma o nisi o le toatele o fanau a le Pasefika ua aoaoina ai le tomai o le siva ua i totonu o ana polokalame nei.
O lea la ua agai mai i Samoa taumafaiga nei ma na vaaia le toatele o fanau a Samoa i le Iunivesite o le Pasefika i Saute ua aoaoina i tomai nei ua aofia ai siva ua tuufaatasia ai taleni mai le Pasefika. Sa faalauiloa ai foi le tomai o nisi o loo aooga i le Iunivesite i le tuufaatasia o laei ua aofia ai mamanu o le Pasefika ma tomai i le suisui faaonapo nei.
O galuega taulima ua mafai foi ona tuufaatasia ai mamanu Samoa, Toga, Tahiti ma isi atumotu o le Pasefika, na faalauiloa uma i lea feiloaiga.
O loo iai tulafono ua faamaopoopo nei ina ia faamautu ai tomai nei mai i le faaaoga e isi, ae o le taumafaiga ina ia tuufaatasia ai polokalame faaleaoaoga, o lea ua molimauina ai le tele o le lagolago ua ave i ai e atumotu o le Pasefika, e aunoa ma le lagalaga o nei faiga faaletulafono.
Faaalia e Seiuli, o le faamautu o mataupu nei o le a faamauina uma ai lava i latou e ana nei tomai ae o a foi atunuu e pulea ina ia taofia ai ni feeseeseaiga e ono tulai mai i ia mataupu i le lumanai.
