Tele fesootai-Centre ua lē toe faaaogā

O nofoaga nei, o fesootai-Centre o le tali lea o le tele o faafitauli tau fesootaiga na feagai ma le atunuu ona o le tumamao ese o le tele o afioaga sa maua ai. O le Palemia lava o le atunuu, le Susuga Tuilaepa Lupesoliai Sailele Malielegaoi, na taulamua i lenei taumafaiga ina ia faalauiloa ai nei nofoaga.

O itumalo o le a tofu ma le fesootai-Centre, o nisi itumalo e tailua nofoaga faapea o le a iai. O totonu o fale nei o le a vaaia e Komiti a tina o afioaga ua filifilia, e faatotogaina i masini computers, ua maua ai fesootaiga tau internet.

Ua iai masini e fai ai kopi o tusitusiga, (photo-copiers), ua iai masini lolomi, (printers), ua iai faxes, ua iai telefoni mo fesootaiga nei, o computers, ma ua iai foi ma masini e mafai ona faaalapopoa ai ni tusitusiga i taimi o fono e talimalo ai komiti a tamaitai, poo ni tifaga foi (overhead projectors).

E faitau miliona tala le tupe na faaalu ai i galuega ua tuufaatasia ai le Malo o Samoa le fesoasoani a le Faletupe o le Lalolagi ma Ausetalia i isi polokalame lava ina ia faaauau ai lenei auaunaga.

“O le faamuamua ua ave i nei nofoaga tutotonu, ona o le faafaigofie ai ona maua e tagata Samoa i nuu i tua fesootaiga e tau malaga mai lava i Apia poo Salelologa foi e saili,” o se saunoaga lea na fai ma avefeau o lenei polokalame mai i le Alii Palemia. O le faamoemoe lava na ave i le faaauau ai o nei galuega, o le faamaoni o i latou na tuu i ai le faatautaiga o nei nofoaga, o tamaitai nei o Komiti e aoina le seleni e totogi ai auaunaga nei.

Mai i le amataga o le polokalame lea e tusa ma le 30 nofoaga tutotonu na tatala i totonu o Upolu ma Savaii, ua na o le valu (8) lava nofoaga ua totoe. E pei ona iai le lima i Savaii ma le tolu o totoe i le motu o Upolu.

O le faafitauli, e pei ona taua e Manu Samoa Anthony Saaga, o le ua faauluulu nei i ai le itu tau i fesootaiga faatekonolosi (IT Manager) a le matagaluega o loo nafa ma le vaaiga o fesootai-Center, MCIT – ua tele lava ina na o le tutu o masini ae ua le o toe faatautaia ai manaoga e pei ona faatuina ai. Ua leai ni sui o komiti nei o toe agai ane e vaai i taimi uma auaunaga nei. O le tele foi o ia nofoaga ua le o toe iai se eletise, motusia le tele o fesootaiga tau telefoni lea e ola ai le initaneti.

Ua tele ina faaaoga e tagata telefoni e tavili ai aiga i fafo ae ua leai ma se toe totogi o pili o telefoni. Sa iai foi le tulaga ua toe talosaga mai i le Matagaluega lenei o Fesootaiga televavave faatekonolosi (MCIT) ina ia totogi pili o a latou telefoni.

O masini la ua na o le tutu e le toe faaaogaina, o lea ua toe lau mai e le MCIT ina ia toe siaki ma toe faaleleia ae ave i nisi afioaga e talosaga atu mo nofoaga tutotonu faapea.

“E leai lava ma se masini ua faaletonu ae o le faanaunautaiga lava ia mafai ona toe faaaogaina e nisi o fesootai-centre nei masini ae lei faaleagaina ona ua umi na taatitia,” o le saunoaga lea a Manu Samoa.

“O se tasi foi o fesootai-Centre na faaleagaina e le Tsunami i le 2009 ma o lea ua maea ona toe faaleleia ma ua faatuina foi i nofoaga tutotonu o Ulutogia lava. Na ia taua foi o loo sailia pea nisi afioaga e mafai ona faatuina ai se isi auaunaga faapenei aua lava le lelei  ma le faigofie ona maua o fesootaiga i auala faaonaponei poo le initaneti.

“E tai lua masina ma agai le matagaluega i afioaga o loo iai lenei auaunaga e asia poo lelei ona faaaoga masini ma toe faaleleia foi nisi o masini e ono faaletonu, aemaise ai le maua pea o le fesootaiga i soo se taimi.

“E le gata foi i lea o le faia lea o aoaoga mo i latou o le a nafa ma le vaaia lelei o nei masini ma le toe faaleleia pea i le taimi e moomia ai. E valu ni afioaga o loo tumau pea le lelei o a latou fesootai-Centre ma le vaaia lelei ai foi o nei meatotino.

O Savaii e aofia ai: Vailoa Palauli, Sagone, Safune ma Auala, ae o Upolu o afioaga nei: Saoluafata, Fuailoloo, Gagaifolevao Lefaga ma Salepoua‘e.

O le faaitiitia ai o le numera o nei nofoaga i itumalo i tua ua mautinoa ua toe agai mai foi la le toatele i le taulaga o Apia faapea Salelologa mo le toe saili ai o nei auaunaga. Ae o le faitau miliona o tala na alu i le faatautaiga o nei faamoemoega, ua manino o le atunuu lava e tulai mai ai faaletonu. E sao ai le tala o le melea o faamanuiaga e maua.