Tau maua loa le gaoi, sosola ae tiai le teineititi

E le o faaititia lava lenei faamai ua sasao faaafi o le gaoi mai totonu o faleoloa. O le tele o taimi ua faasasa ma fai ma faamolemolega le taugata o le soifuaga, ae o le mea moni lava, o le toatele o nisi tagata, e foliga ua fai ma a latou vaisu lenei fiafiaga o le sauni e gaoi ma sei faavave ni oloa i totonu o faleoloa.
O le matautia o lena gaoioiga le alofa, e au ina galo ai nisi mea e sili ona taua e pei o fanau, ae ua mua ona pefu e sue se mea e lafi ai ina ua maua taitaia.
O le Aso Toonai na mavae atu nei, na tupu ai se mea faapena i le taulaga faatau i Sylvia Park, lea na faasalalau mai le nusipepa o le Herald o ananafi, le masalomia o se tasi ulugalii e leoleo, o loo fai se la gaoiga oloa i totonu o faleoloa i lea taulaga faatau.
O le itu malie lea ae le manaia, aua ina ua agai atu leoleo e fesiligia le ulugalii lenei i ni masalosaloga o lea e gaoi i totonu o faleoloa, na agai ese faavave loa ae tiai ai le la tama, le teineititi 9 tausaga. Na toe taofi e leoeo lenei ulugalii a o taumafai e o ese mai le faleoloa mo lavalava o teineiti laiti, le Pumpkin Patch i Sylvia Park lava.
O le mea ua tupu, ua mua ona alu le tuli mai leoleo, ae tiai ai si tineititi lea o loo tumu ona lima i ato faatau nei. Na iu ina toe foi ane i si o la alo, ma maua ai loa le avanoa o leoleo e faatoatoa ai ona fesiligia.
Fai mai le alii leoleo asiasi, Chris Robinson, e iai lava le talitonuga o leoleo, o lenei ulugalii sa faia ni a la gaoiga i totonu o faleoloa e ui lava e lei maua lelei e leoleo se faamaoniga, ma e lei faia foi la ni moliaga.