Seti le isi matatia fou a Vili

Ua amata ona faailoga fesili pe mata e toe mafaia e se tasi ona faatoilalo le aao malosi o loo liai ai nei e le tamaitai pine auro o le Olimipeka le togiina o le pulu mamafa. O lenei ua faasolosolo foi taaloga a le tamaitai o Valerie Vili i ana taamilosaga eseese i lenei tausaga, ma e amata lava foi i le manumalo, e pei ona ia liai ai foi le pulu mamafa i se isi mamao uigaese, lea ua toe faatulai ai foi e Vili se isi matatia fou, i afeleti a le Black Singlet Invitational, e pei na sa faagasolo i Aukilani i le vaiaso talu ai.
O lea tauvaga sa iai faatasi Vili ma le tamaitai sa la tauivi mai foi i le Olimipeka, le tamaitai o Nadzeya Ostapchuk mai le atunuu o Belarus, lea na ia faatepa ai lana au maimoa i se isi mamao mataina, e 20.25mita.
O le tamaitai na pine apamemea mai le Olimipeka, Ostapchuk o le tagata taalo mulimuli lea na mafai ona faatoilaloina Vili i le manumalo, ina ua malo Ostapchuk i le suega siamupini o afeleti a le lalolagi i le tausaga e 2007 i taaloga i Stuttgart, peitai o le taimi mulimuli foi lena na iloa ai e Vili faitau le tulaga lua, ae o lenei ua na o le saofai lava o Vili i le tulaga muamua i le taimi nei.