O fuainumera o le 1.5 tikeri ua naunau atunuu laiti e pei o Samoa e tatau ona ausia e Malo uma e faaitiitia ai kasa oona e puaina atu i le ea ona mafai ai lea ona tumau atunuu maualalo i se tulaga saogalemu mai le siitia o le suasami.
I atunuu malolosi ma mauoloa e pei o Amerika ma Ausetalia e lē o mananao e faaitiitia ifo i le 1.5 tikeri kasa oona mai falegaosi oloa o loo latou gaosia ai oloa o loo mafua ai le kasa oona ua faamautuina e tagata suesue popoto poo saienitisi ua mafua ai ona vevela le afuafu o le lalolagi ma ua manifinifi le mafuaaga o suiga tetele o le tau ua aafia ai nei le lalolagi. O le fono i le vaiaso ua mavae i Pale i Farani a taitai o Malo o le lalolagi sa talanoaina lenei mataupu i se taumafaiga e ausia e atunuu uma se maliega e mafai ai ona faaitiitia le malosi o kasa oona o loo mafua ai ona tupu suiga o le tau. O le mafutaga soo faatasi a malo laiti o le lalolagi e 44 o loo fili ai ma Samoa. O atunuu nei o loo latou finauina malo malolosi ma lelei tamaoaiga e alologa e aumai i lalo le malolosi o kasa oona mai a latou falegaosi oloa. O loo faataliga tuli pea nisi o malo nei ona e lē o mananao i ai. O le afioga i le Ao o le Malo o Samoa na ia faia se malelega i le tausaga e 2004, sa ia faailoa ai e fā lava vaega tāua e tatau ona maua ai le filemu o le lalolagi. O se tasi o ia vaega tāua o le sioisomaga e ao ona puipui malu ma faapelepele i ai tagata auā o se isi lea o itu e sili ona tāua i le soifuaga o le tagata e maua ai le filemu.
O Samoa ua faamauina o se tasi o atunuu e sefulu o le Pasefika o loo tumatila lona tulaga maaleale mai aafiaga o suiga o le tau. O le feau tāua lea ua lē gata nei ina momoli e faalapotopo toga tumaoti, o taitai o Malo laiti ae faapea ia i latou o le aufaipisinisi o loo popona i le faatāua o le ola fiafia o tagata ma lo latou siosiomaga.
O le fonotaga i Pale i Farani sa auai le afioga i le Palemia susuga Tuilaepa L Sailele Malielegaoi ma lana usugafono. O le mau foi lea sa tulei e Samoa o le aumai i lalo o le malosi o tikeri o kasa oona. Ua faaalia e le faalapotopotoga o tina faipisinisi o Samoa o le tāua o aiātatau o tagata o le amanaia lea e malo tetele o le tuualalo o loo finauina e malo laiti ina ia mafai ona maua ai se ola fiafia ma le atinae lelei o tagata soifua o atunuu laiti. O le faalapotopotoga lenei o loo tu malosi i le unaia o taumafaiga a faalapotopotoga laiti ma tina faipisinisi o le atunuu.
