Ua tu lata mai i le siui o le faagasologa o polokalame faaauau i soo se faalapotopotoga ma mafutaga sa faavae mai i le faatulagana o galuegafai o le tausaga.
O le tasi lenei o mafutaga e taunuu ai le isi a tatou fuaitau e “Laitiiti ae maini” auā foi o le faagasologa mai o le tausaga, sa faatinoina pea faamalositino ma le Zumba auā le tausiga faaauau o le soifua maloloina lelei, ma e lei iai lava se faaletonu auā sa maitauina pea le taupati mai o tagata o le Community e fia faaaogāina lenei avanoa lelei e aunoa ma se totogi, ona ua mautinoa le maua lelei ai o le auga o aute i le fia faaitiitia o le tino puta ma le soona lapopoa. O lenei avanoa sa faaaogāina ai lava le maota o le aulotu i Manurewa i le aiga lotu o loo tausia e le susuga i le faafeagaiga, Susuga Rev Talia Tapaleao ma le faletua ia Feagaiga Tapaleao. O se polokalame sa talafeagai ma le manaomia tele e tagata auā le fesoasoani i le tau faalaloina o le tino lapopoa (obesity) faatasi ai ma le tino mamafa. O lenei foi mafutaga faifai pea i afiafi o Aso Tofi ma le taeao o le Aso Toonai, ua maua ai foi pine faamau o lona faatinoga aua ua maitauina le suiga o le vaai i le faaitiitia o tino o le toatele o i latou sa faaaogāina lelei le Zumba ma faamalositino, faatasi ai ma fefaasoaiga i le gaseseina o mea taumafa ma lelei mo le tausiga o le tino.
O le afiafi la o le Aso Tofi lea na fai ai le Break-up a le mafutaga lenei ina ua tatau ona faia se malologa ona o le vaitau o le Kirisimasi ma le Tausaga Fou ua fotuai mai nei. O le Susuga lava Rev Talia Tapaleao na ia saunia le faafetai ma momoli lapalapa o malo na osia ai le taulaga o le faafetai i le Atua ina ua faaiuina ma le manuia lea foi faamoemoe tāua, ma le fuafuaga o le a sema se taimi e toe amataina ai lea mafutaga i se taimi o le tausaga fou. Na saunoa foi le taitai o le mafutaga a le Zumba le Susuga Faamagalo Malele e faafetaia ai le galuega fita a faiaoga ma le au lagolago i le faatinoga o taga o le Zumba i lenei tausaga atoa, le Susuga Magele ma lona faletua ia Fonoti Gu, aemaise o le tausala ia Gloria Tapaleao.
Na momoli foi le faamalo ma le loto fiafia tele a le taitai ia i latou uma sa faaaogāina lenei avanoa aemaise o le faatāuaina pea o lenei polokalame mo le tausaga atoa o le vaaia lelei ma le tausia lelei o le soifua maloloina.
