Ua teu fatu ile Komesina ma le pulega o falepuipui le fautuaga ua ave iai ele Palemia ina ia silasila i le tulaga ole malosi poo le fitness o alii ma tamaitai leoleo ole falepuipui.
Ua tatau ona litaea leoleo falepuipui ua matutua ma ua le toe maua le malosi faatalavou ona ua lapopo’a tele tino ae avatu ni leoleo falepuipui e vae mama ma malolosi e saoasaoa i le tuliina o pagota sosola. Ole vaiaso na tea nei na toe sola ai foi se isi pagota ma ua faaalia ele Palemia le susuga Tuila’epa L Sailele Malielegaoi, ole pagota na sola sa kuka ae toafa leoleo sa tiute ile taimi lea na faia ai le gasesega a le alii pagota. Peitai na faamatala le Palemia na maua le avanoa ole pagota e sola ai, na puna ile va o leoleo ma momo’e ese ae sa lē mafai ona tuliloa e leoleo na tiute. Ole laki ole aiga o lea alii pagota na latou momoli i Tafaigata lo latou tagata.
Ua faatusa ele Palemia le lapopoa o nisi pagota i tino o tama pii sumo a Iapani ma ua saunoa Tuilaepa, e lē manaomia ni ituaiga o tino faapea mo ni leoleo e vaaia pagota auā ole taunuuga ole sosola ole aunofosala ae faigata ona o latou faia ni gaioiga e toe maua ai aemaise lava ole taufetuli.
Ua ave ai le fautuaga ale Palemia ile Komesina o falepuipui e tatau ona ave leoleo ole toese e koleni ia maua le malosi ma e matagofie ae avane i aso uma e tamomo’e amata atu i Apia ae tini ile falepuipui i Tafaigata.
Ua faaalia ele Palemia ole sasi ole pulega ile faatinoga o lana pitolaau le mafuaaga ole sosola soo o pagota. Ole vaiaso na tea nei na asia ai ele Minisita o Falepuipui le afioga Tialavea Tionisio Hunt ma le Ofisa Sili ole Matagaluega ole Tupe ale Malo le tulaga ua iai galuega ole falepuipui i Tanumalala.
Ua ta’utino le alii Palemia ole a lē toe tupu le sosola o pagota pe a siitia loa le nofoaga ole toese ile nofoaga fou.
Ole pa ole a siomia ai le falepuipui fou ole a fausia ia malosi ma malu ina ia lē mafai e se pagota ona sola ese.
Faaalia e Tuilaepa ole silasila mamao ale Malo ile aveese ole falepuipui i Tafaigata mai le nofoaga ua toatele aiga ua faamautu ai, na fuafua ai le falepuipui ua fausia nei i Tanumalala. E sefulu miliona le tau atoa o lea galuega ma ose nofoaga e lata ile mauga o Tafuaupolu oloo fausia ai le falepuipui fou.
