“O lea ua uma suesuega ma ua tapuni le fesootaiga na fau e se tagata”
Na faia i luga ose itulau ole fesootaiga televave ole facebook ni faasalalauga i fuafuaga ole atinae ole Malo o Samoa, ma o lea itulau sa matamata tetele ai le suafa ole afioga ile Palemia, Susuga Tuilaepa Lupesoliai Sailele Malielegaoi.
Fai mai se tasi o faasalalauga i lea itulau ole a sii ele Malo le faamanuiaga tupe ole penisione mo tagata matutua mai le 135 tala oloo iai ile taimi nei ile 200 tala ile masina.
“Ole ā le itulau?,” ole fesili lea ale Palemia ina ua ia maua ni faamatalaga ma molimau i lana itulau i luga ole facebook.
Ole taimi o aso fiafia ole Kelisimasi ma le Tausaga Fou na iloa ai foliga ole itulau ale Palemia ma lona suafa. Peitai o lea ua faamaonia nei na faia suesuega ina ua iloa lea tulaga ma tapuni ai loa.
E lē o iloa poo ai le tagata ulavale ua na faia le itulau ale Palemia, tusi ai le suafa o Tuilaepa Lupesoliai Sailele Malielegaoi.
Ile feiloaiga masani ale Palemia ma tusitala ile vaiaso ua mavae atu nei, na oo ai se finagalo o Tuilaepa ile mataupu i faasalalauga oloo faia ele fesootaiga ole OLP poo le OlePalemia.
Ole faasalalauga lata mai a OLP na aliali mai ai ni faasalalauga e faapea ua sauni se tasi o alo tamaitai ole Palemia e tauva ile palota tele ole 2021 mai le itumalo oloo tulai mai ai le Sui Palemia le afioga Fiame Naomi Mataafa.
Ua fai mai foi lea faasalalauga ole isi atalii ole Palemia ole a tauva mai ile itumalo o Lepa oloo tulai ai Tuilaepa ile tofi faipule. Na faaalia ele Palemia ile feiloaiga ma tusitala, na te’i ina ua vili atu lona afafine ma faailoa atu ai ia faasalalauga auā o ia (Tuilaepa) e lē faitau ai i fesootaiga a OLP. “Se’i vaai la ile pepelo o ia faasalalauga fai mai o lo’u afafine ole a tauva mai Lotofaga ae e leai se matai o lo’u afafine i Lotofaga”.
Na faailoa ele Palemia le suafa ose tagata sinia sa galue ile Malo (taofia le suafa) oloo i tua ole OLP faapea le suafa ose tamaitai loia oloo lotolotoi i faasalalauga ale OlePalemia. Sa faailoa foi e Tuilaepa e iai le isi tagata oloo i totonu o lea fesootaiga loo faamautu i Amerika Samoa, a’o le isi oloo nofo i Niu Sila.
“Ua ou iloa uma latou nei ma oute lē palafu la.” Faaalia ele Palemia o lapisi uma oloo aumai i ia faasalalauga ae na ia saunoa foi e lē faitau iai i ia faasalalauga e ma’umau ai lona taimi tāua oloo faamuamua i tonufai mo le atinae manuia o Samoa.
