Tatau ona aoaoina tagata lautele, taua tiute o tagata pueta ma tusitala

O le taumafaiga a nisi e faaoolima ma faalavelave i le galuega a se alii pueata o se nusipepa ma se pueata o se faletelevise i Samoa a o pueina ata o le susuga Lealofi Oto, sa avea ma faifeau o le EFKS o loo faatalia nei se faaiuga a le faamasinoga i lona moliaga o le faaoolima mataga i se teine 17 tausaga le matua o lana aulotu a o ia tausia le EFKS i Saanapu, ua finauina ai e le sosaiete o tusitala i Samoa le JAWS le tatau i le lautele o le atunuu ona latou amanaia le taua o le galuega o loo faia e pueata ma tusitala o loo lipotia taualumaga a le faamasinoga. O le faanaunautaiga foi lea o le vaega o tusitala i le Pasefika o loo latou tausisia le saolotoga e faatino ai lea auaunaga e pei ona faaalia e le sui taitaifono o le Pacific Media Freedom Group, o Monica Miller, o se tamafanau a le atunuu o loo aumau ma galue i Amerika Samoa.
Talu ona amata taualumaga o lea faamasinoga i le tausaga ua mavae e oo mai i le tausaga nei, e vaaia pea le taumafai ane o nisi o alo o le o loo molia e taofi le galuega a le au pueata. O le taumafai o nisi o le aiga o le o loo molia e faaoolima i alii faasalalau na tuuina atu ai se tagi i leoleo, peitai ua toe tatala i tua ina ua toe soalaupule lelei le mataupu. O le pueata o le nusipepa na oso i le potu o le faauluuluga o le matagaluega o faamasinoga ma maua ai lona lafitaga. O le susuga Lealofi Oto, 62 tausaga o le soifua, ua soloia le isi moliaga o le taumafai e faia se faigaaiga faamalosi, le attempted rape, ina ua maea se isi iloiloga a le alii faamasino o Vui Clarence Nelson, ma ua teena ai le faaiuga a le laulau o faatonu poo le jury na latou faamaonia lea moliaga. O le masina fou o Aperila e lau ai se faaiuga o le moliaga o le faaoolima mataga o le ua molia, aua ua lagolagoina e le faamasinoga le faaiuga a faatonu e faamaonia, ma e fitu tausaga i le falepuipui le faasalaga maualuga o lea soligatulafono.