Ua toe siitia nei le numela o tagata faigaluega a le kamupani tele o le Yasaki i Vaitele lea ua toe faaopoopo le 120 tagata faigaluega ma maua ai le 800 o alii ma tamaitai ua toe galulue i le kamupani, i le tuanai o nai masina talu ona vaea se isi vaega o le aufaigaluega, ae o nisi ua faamavae ina ua faaitiitia aso ma itula faigaluega, e mafua i aafiaga tau tupe o le kamupani.
Faaalia e le pulega o le Yasaki ua amata foi ona toe siitia manaoga o uaea mai le kamupani gaosi taavale i Ausetalia o loo ave i ai ana oloa ma o se isi lea tulaga fiafia, ae talosia ia faaauau ai pea. O le faaiuga o le vaiaso nei e afea ai Samoa i se faigamalaga a le minisita o fefaatauaiga a le Malo o Ausetalia le alii o Michael Green, lea o le a asiasi faapitoa i le Yasaki e feiloai i le aufaigaluega. Ua talitonu le kamupani o le tuuina atu e lea Malo o se fesoasoani tupe e tusa ma le $1.2 piliona tala Ausetalia e toe faaleleia ai kamupani gaosi taavale a lea atunuu, o le mafuaaga lea o tulaga lelei ua toe vaaia i le tautua ma le auaunaga a le Yasaki i Samoa.
O se fuafuaga na faaalia e nisi o loo faigaluega ai i le taimi nei o se itu lelei tele lenei ona sa iai le manatu e iu ina tulaga faaletonu galuega o loo fesoasoani tele i le tausiga o le aiga aemaise o mea fai a aiga, nuu ma ekalesia. O se taimi e lei mamao atu na faaitiitia ai le aofai o le aufaigaluega ma vaea ai nisi sa maua e le Samoa Times faamatalaga na faimalaga atu nisi i Tutuila e saili galuega ai i kamupani e pei o le Star Kist ina ua faaletonu ma faamuta galuega i totonu o le Yazaki. O se tasi lenei o kamupani aupito i tele i le atunuu ma faafaigaluega ai foi ni alo o Samoa e toatele e le gata i alii ae faapea foi i tamaitai.
