O le aso atoa na fofogaina ai finagalo o taitai tamaitai o Samoa e faatatau i auala e mafai ona fesoasoani ai i tamaitai o Samoa e unai avanoa tutusa i soo se auaunaga o loo galulue ai.

 
O soo se mataupu lava na talanoaina i lea fonotaga e pei ona faatautaia e le faalapotopotoga ua unaia le faamalosia o tamaitai i soo se atina’e, le Asia Pacific Peace, mai i Ausetalia.

 
Na amata mai lava i le uluai minisita tamaitai o Samoa, Afioga Fiame Naomi Mataafa, le uluai loia tamaitai o Samoa, Ruby Drake, le uluai tamaitai na pulea le matagaluega o tupe a Samoa, Hinauri Petana, i le uluai Loia Sili tamaitai, Brenda Heather Latu, o le pailate muamua tamaitai o Samoa ma le Pasefika, Tasalautele Sapolu, i le uluai pule tamaitai o le NPF Faumuina Esther Lameko, se tasi o tamaitai loia na ofi atu o se sui a faipule, Maiava Visekota Peteru, o se tasi o loia talavou ua i totonu o le ofisa loia aupito telē i le atunuu Vaai-Hoglund ma Tamati, o Unasa Leilani Tamati, ma le toatele o isi tamaitai, o taitai o le atunuu, na folasia uma o latou finagalo ina ia fesoasoani e unai avanoa tutusa ma faamalosiau i tamaitai o le atunuu i lea fonotaga.

 
E maoae foi le vaai i le maualuga o le tulaga ua iai tamaitai i Samoa e pei ona molimauina i lea fonotaga ae ua tutu faatasi nei ina ia saili pea auala e mafai ai ona aveese le tele o faailoga tagata ua aafia ai le toatele o isi tamaitai i Samoa aemaise foi le Pasefika.

 
O Samoa ua amata atu ai le polokalame lenei ma le faamoemoe e faasolo i atunuu o le Pasefika. O le tele o nei molimau a ia taitai na faapea ona o latou ta‘ua le tele o faafitauli ua feagai ma tamaitai Samoa ona o le auala ua aoaoina ai tamaitai mai i o latou aiga i le tuputupu a‘e ai.
O tamaitai e pei ona malilie uma ai nei taitai, e tāua tele i le aganuu a Samoa, auā ua soifua mai ma lona faasinomaga i totonu o lona aiga ma totonu o le faa-Samoa.

 
“Ae afai e tāua tele tamaitai Samoa, aisea ua fasi soo ai, aisea ua faamalosia ma sauaina ai i auala matagā?” o le fesili lea a le tamaitai Minisita, le Afioga Fiame Naomi Mataafa.

 
O le saili o mafuaaga ia na ia ta‘ua o le a mafai ai ona saili se fofo ina ia mafai ai ona taofi le faailoga tagata ua faia faasaga i tamaitai o le atunuu.
O le mau a isi taitai tamaitai, e tāua le sui o mafaufauga o le toatele ua tamau ai i lenei vaitaimi, ma o nisi o auala ua unai o le aoaoina o tamaitai ina ia mafai ona loto tele e tali atu i faailoga tagata ua faia faasaga ia i latou.

 
Fesoasoani i tamaitai ina ia malamalama i tulafono ua iai nei e puipuia ai i latou, ia mafai e tamaitai ona maua le saolotoga e galue ai ma ia maua le tamaoaiga o loo faalagolago ai i o latou taitoalua ina ia faamalosi ai foi e fai faaiuga tāua i totonu o le aiga, ekalesia, nuu ma le Malo.
O le isi mau o le faamuamua o le Atua i soo se faaiuga fai ma ia fesootai ma le Atua i aso uma e fesoasoani tele i le faamalosiau i tamaitai.
I le tulaga tau i sauaga i totonu o aiga na laga ai le tulafono fou lea ua iai mo le Puipuiga o Aiga lea na pasia i le tausaga na tea nei ma na ta‘ua e le Minisita o Mataupu tau Tina ma Tamaitai, Atinae o Nuu ma Aga Fesootai, le Afioga Tolofuaivalelei Falemoe Leiataua, o se tulafono o le a mautinoa le taulai sa‘o lava o le tali e mafai ona avatu e le tulafono i le mau sauaga ua vaaia faasaga i tamaitai o le atunuu.

 
O le aafiaga o tamaitai i le soifua maloloina, aafiaga i faaletonu o le siosiomaga, aafiaga o tamaoaiga na talanoaina uma i lenei fonotaga.
O lea la ua tatala se upega tafailagi ina ia mafai ai ona faamautu lea fonotaga amata ma ua taloina ai le fesootaiga ia faamalosias i le va o tamaitai i Samoa ma isi atumotu o le Pasefika ma le faamoemoe, o se tasi lenei o auala o le a faaitiitia ai faafitauli o loo lapelapea ai pea taumafaiga a le toatele o tamaitai o le atunuu ina ia unai lo latou atinae.

 
O le upega tafailagi na faatupe e Ausetalia ma na ta‘ua e le alii na tatalaina aloaia lenei fesootaiga, o le faanaunautaiga o le malo o Ausetalia ina ia iai se suiga i soifua o tamaitai o le Pasefika i nei fesootaiga, ma ia aveesea ai faailoga tagata ua faapea ona vaaia pea i totonu o le itulagi e ui i le tele o suiga lelei ua vaaia i atunuu e pei o Samoa.

Le upega tafailagi mo fesootaiga a tamaitai o Samoa ma le Pasefika Nisi na auai i le fonotaga Nisi o tamaitai sa iai i le fonotaga a tamaitai o Samoa Nisi o tamaitai sa iai i le fonotaga a tamaitai o Samoa