Ua toe feoai solo foi tala o le lagomia o lagona o nisi faipule o le vaega faaupufai e puipuia aiā tatau o tagata le HRPP i le lē faia o se faaiuga a le taitai poo le afioga i le Palemia i le minisita o Tupe le afioga Faumuina Tiatia Liuga.
Ua mafua ona toe aliali ia lagona tiga ona ua aliali i le lipoti a le suetusi sili a le Malo ni faaletonu i le faatinoga o tiute o lea minisita i se tasi o faigamalo ua mavae a o avea ma minisita o le Matagaluega o Punoa Faalenatura ma le Siosiomaga lea sa iai ma le vaaiga o le faalapotopotoga o eleele o le malo le Samoa Land Corporation.
Ua faaalia e se tasi o faipule o le HRPP le susuga Papalii Niko Lee Hang i se tasi o lipoti a se nusipepa i le atunuu i le faaiuga o le vaiaso ua mavae, le aafia o le lotoifale o le vaegafaaupufai ona o lea mataupu.
O se finagalo o le faipule o loo i totonu o le komiti o tupe faapalemene o loo avea ai foi ma taitaifono, na ia folasia i taualumaga a le fono aoao talu ai nei, le lē tausisia e nisi o faalapotopotoga a le malo o aiaiga o le tulafono o le Public Bodies Act o le lē tuuina atu o lipoti faletausaga e faailoa atu ai i le Palemene le faaaogāina o tupe a le Malo ma nisi o galuega o loo latou faatino mo le manuia o le atunuu. O le faalapotopotog o eleele a Samoa e ono tausaga e lei oo atu ni lipoti.
E lē gata o lipoti a lea faalapotopotoga ae o le lipoti a le suetusi sili a le Malo o loo faaalia ai ni faaiuga lē talafeagai a lea faalapotopotoga i le fausia o lona ofisa fou ua iai nei i le malae tapolo i Faleata ma le faatauina o se taavale fou mo le minisita sa iai i lea taimi le afioga Faumuina Tiatia Liuga.
O vaega ia o loo lagomia ai finagalo nisi o faipule o le HRPP ona ua faia ni iuga i nisi sui o le faafaletui aemaise faaiuga ua faia i nisi tagata faigaluega a le Malo ona o le lē faamaoni, ae e lē o faia lava se iuga i le minisita sa iai i lea taimi lea ua avea nei ma minisita o tupe.
Fai mai ni tala salalau e lei faamaonia e iai se fono a le Kapeneta lata mai i se vaiaso e lei mamao tele atu na folasia ai se finagalo o se tasi o minisita sinia faasaga i se faanoanoaga o nisi minisita o le Kapeneta ona e lē o iai se faaiuga a le taitai le Palemia i le mataupu.
Ua laumanuia ai foi la ma ni faamatalaga i le iai o nisi o faipule o le pati ua sauni e faamavae pe a lē faia lava se faaiuga.
O se tasi o lipoti a se tasi o nusipepa i lo tatou atunuu i lena vaiaso ua mavae o loo ta‘ua ai e le sui failautusi o le Kapeneta sa fesiligia e lea nusipepa, e leai se fono a le kapeneta na folasia ai se mataupu faapea, pe sa talanoaina foi.
O lena vaiaso ua mavae e lei aumaia lava se finagalo o le Palemia le taitai o le HRPP i le feoai solo ai o nei faamatalaga ma o le a tuliloaina pea mo se faamaoniga mai le taitai. O le aso fanau na faamanatu ai le 35 tausaga o le HRPP na saunoa ai le taitai ma ia faailoa e lē sa‘o ni tala o loo faasalalau solo e le Itu Agai o loo ta‘ua ai le malepe o le maopoopoga o le HRPP.
Peitai na saunoa le alii Palemia i le aso fanau lea, o le taimi lava e lē toe maopoopo ai o le a tele ni tausaga i le lumanai pe afai e tupu, e lē toe oo ai le HRPP i le tulaga o iai nei. Ua 30 ma ona tupu tausaga o tauaveina pea e le vaega faaupufai lenei le tauaveina o galuega a le Malo.
