O le vaiaso lenei ua amata ai talaiga ma faalauiloa ile tetee atu ile sauaga o tina ma tamaitai, ua ofo mai ai e le faalapotopotoga o tina ma tamaitai o atunuu o le pasefika ma atunuu i sauté o asia le PPSEAWA, poo le pan pacific south east asia women association, ma le lagolago a se tasi o tama fanau a le atunuu ua iai ona faailoga ile taaloga o le taekwando o Seti Atimalala, se aoaoga mo tina o lea taaloga e avea ma nea faigaluega e puipuia ai lo latou saogalemu poo le self defense. O se tasi lea o vaega o polokalame o lenei vaiaso i taumafaiga e tafiesea soo se sauaga e aafia ai tina ma tamaitai.
O le afiafi nei ile iunivesite aoao a samoa o loo faia ai lea aoaoga ma o loo tatala mo soo se tina ma se tamaitai e aunoa ma se totogi. Ua toatele tina ua faaalia ise lipoti mai le matagaluega o leoleo ua aafia i sauaga, ma o le taua o le silafia e tina o metotia e faatino ai le taaloga o le taekwando o le taua foi lea o gaioiga nate faia e puipuia ai lona saogalemu mai se osofaiga, ilo la va ma lona to’alua poo soo se tagata lava e taumafai e nate foua se tamaitai.
O loo fuafua foi e le faalapotopotoga a tina o le pasefika ma atunuu I sauté o asia se savali tele ile aso Lulu o le vaiaso nei mai le ofisa o le fuimu agai atu ile eleele fou I luma maota o le Malo e faailoa lava taumafaiga e tete’e atu i sauaga ua aafia ai le ituvai o tamaitai ma tina o le atunuu aemaise o le lalolagi atoa. O loo fuafua poo le itula e valu ile taeao e faia ai lea solo.
