Na matuā mataina le manumalo a Samoa ia Niu Sila i Dubai auā o le taimi muamua lea ua sii ai e Samoa le Siamupini i totonu o le atu Arapi.
E leai se Samoa i soo se vaega o le lalolagi e lei matamata ma tusitusi i luga o le Facebook e lei saunoa i le maoae o le finau a le ‘au a si o tatou atunuu.
Na sao mai Samoa i lana pulu sa faigata i le aso muamua mai ia Portugal, Aferika ma Egelani e ui na malo Egelani 19-17.
Peitai o le aso lona lua o le aso faaiu foi lea na toe oso ai le malosi o le Manu ma malolo ai Wales i le Quarter Final autū i ‘ai 19-5. Na vaaia pea le to‘a o le susuga i le faiaoga ia Tausa Faamaoni Lalomilo i le sao atu i le Semi Final.
Na faateia tagata i le faia‘ina o Fiti i le Quarter Final muamua e 8 Falani i le 5. Na tapenapena lava foi le Kapeteni ia Reupena Levasa ma le ‘au atoa mo le fetauiga ma Falani i le Semi Final o le Ipu autū.
E latalata i toe minute o sili le Manu Samoa 7-5 a Falani ae peitai sa osofai lava Falani ma toeitiiti lava oo i le laina ae faasalavei loa e Robert Lilomaiava le pasiga ma faasasa‘o atu ai i le laina sikoa mo ‘ai faaiu Manu Samoa 12-5 aemaise lona avanoa i le sailiga o le ipu autū lea na sao ane ai Niu Sila.
Na matuā faigata le amataga o le Quarter Final a Niu Sila ma Portugal ae na manumalo Niu Sila toe manaia lana finauga ma Kenya i le Semi Final. Mulimuli ane na sao Niu Sila i le Ipu autū o loo faatali mai ai Samoa.
O le ‘au a Samoa na paleni le iai o tama tuai pei o Alatasi Tupou, Reupena Levasa ma Afa Aiono ae peitai o sui fou uma. E lei atoa se sefulu sekone ae sikoa Paul Perez mai se osofaiga mai le kiki amata.
Na sosoo ai ma le isi sikoa a le Manu Samoa i le fa minute muamua ma mafanafana ai. Ua fiu Niu Sila e tau faasaosao a latou tama fou ae na matua logo i le pue ma le puipui a le Manu.
O se vaaiga mataina sa iai i le malosi o le puipui ma le pue a Samoa, e oo lava i tama tuai a Niu Sila e pei o DJ Forbes, Cama, Mikelson na matuai solomuli.
Ma e uma le taimi ua matuā pulea e Samoa le taaloga atoa ma manumalo ai i le 26-15. O se aso faanoanoa mo Niu Sila auā na toilalo foi le Olopeleki ia Egelani i ‘ai 38-21 e pei ona mataina ai le taalo a ManuSamoa Tuilagi mo Egelani.
Ua see atu nei Samoa i se pulu faigata i le vaiaso nei i George i Aferika lea o le a iai i le Pulu A ma Ausetalia, Egelani ma Aferika i Saute.
