Faaauau le tofi e Veletaloola Kaleopa (Acting President)
Ua tatala ofutau ma sulu le pelu i lona faamoega, ma ua lē nofoia ai le nofoa o Tavita.
O le usuia o le fono e le fetalaiga ia Faimalo Faleiva Tau mai Safotu, ua avanoa ai le nofoa o le Peresetene a le mafutaga a le Logan Samoa Advisory Council i Logan City.
O aiaiga a le Mafutaga, a faamavae pe maliu foi a o umia le tofi Taitaifono a o loma le fonotele faaletausaga (AGM), o le a see atu le Sui Peresetene na te tauaveina le Tofi o le sui Taitaifono (Acting President) e tālia ai le fono faaletausaga.
Ua manino le mata o le vai ma ua see atu nei le Sui Peresetene le susuga ia Veletaloola Kaleopa na te gafataulimaina fuafuaga a le mafutaga seia maua se tasi i le fono o loma nei.
O le faletua ia Uo Alalatoa Brown o loo avea ma failautusi faapea le Faletua ia Lesa Changwai o le Teutupe ma le sooupu a le mafutaga.
O le tofa ia Faimalo Faleiva Tau sa avea o se sui faasetete o Brisbane e aofia ai Sini ma Melepone sa o latou galulue punouai e tapena ma sauni e momoli se mau i le Palemene o Ausetalia ina ia alofagia nai tagata malaga mai Niu Sila ua lē agavaa i le tele o manuia tau seleni aemaise lava
alo ma fanau ua oo atu i Iuniveste.
O le isi fono o le a usuia i Sini i le Aso Tofi, 28 o Fepuari lea e lē o mailoa pe auai se sui o Brisbane. Ia manuia tele le alo atu o le susuga ia Veletaloola Kaleopa mo le tauaveina o le tofi Taitaifono a le mafutaga i lenei taimi. Ia pa‘ū se toa ae toe tulai mai se isi toa!
