Faalauiloa le MTV & CD Vol 2
Na faatumulia le nofoaga faafiafia o le Apia Way i le taulaga faatau i Magele i le afiafi o le Aso Toonai talu ai, ona o le fia maimoa o le atunuu aemaise i latou e fiafia i le itu tau musika, i le alii pese o Maulolo Lino Pogai, a o faalauiloa ai iinā ma lana MTV fou ma le CD pese le Volume 2 o ana musika.
O Maulolo o se alii pese e tupuga mai afioaga o Afega, Tuanai, Leauvaa, Faleula i Upolu, faapea Samauga i le motu tele i Salafai, ma pe tusa nei ma le lua tausaga talu ai, sa tatalaina ai lana uluai CD pese, ae o lea la ua toe tatala lana Volume 2 e pei ona faalauiloa ai i lana faafiafiaga i le afiafi o le Aso Toonai talu ai.
Sa faafiafia ai foi i lea afiafi le faili numera tasi i Niu Sila, Le Folasi Band, a le susuga ia Sonny ma lana aufaafiafia.
Sa faapena foi ona pese ai ma se tasi o tamalii ua iloga i le atunuu i lenei lava taleni o le musika, le tofa Pagamalie Iopu Faivalu. Na faatauina ai lava i lena afiafi ma le MTV fou ma le CD pese a le alii o Maulolo.
O loo faaigoaina le CD Vol 2 a Maulolo i le “Daddy ea tepa mai”. E 10 pese o lenei tautua pese, o loo fefiloai ai pese faaleagaga, ma nisi foi o ana fatuga lava o pese faalogologo ma pese e aualofa ai foi i ē pele i le alii pese.
O le kamupani pue pese a le Breakthrough Recording Studio i Vaimoso, i Samoa na tapenaina ma tuufaatasia lenei tautua pese. Faamalo atu foi i lenei tamafanau o Samoa, i le finafinau e faaolaola pea lana taleni ua faamanuiaina ai e le Atua, auā e ui o se taleni o loo sailia ai foi se manuia o aiga i le tulaga tau seleni, ae o le mea mautinoa ua fai ai foi se sao tele o Maulolo, i le atinaeina o le musika i totonu o tagata Samoa ma lona tamaoaiga.
