O le auaunaga a le kamupani lafotupe faamomoli ma tala ai seleni e faamomoli mai fafo ma Samoa le Pacific Ezy Money Transfer ua silia i le sefulu tausaga. O le toatele o le atunuu e malaga mai i le itu i Sasa‘e o Apia amata atu i le Vaimauga e oo i le Anoamaa ma Aleipata aemaise nuu agai i le falemai i Motootua ma alu i Vailima seia paia Siumu ma Falealili e fai si mamao o ofisa o le kamupani i isi itu o le taulaga e latalata i le Filimaketi i Savalalo ma le maketi i Fugalei.
O lea ua latalata mo i latou le ofisa fou i le maota o le ekalesia Katoliko le Tuutuuileloloto i Apia. Faaalia e le alii pule faatonu le afioga Muliagatele Faimalo Allan Stowers, ua pei ua tumutumu tele le atunuu i le itu i Sisifo o le taulaga ona o pisinisi o loo iai, ae ua gaogao le itu i Sasa‘e.
O le isi mafuaaga lena na manatu ai le pulega e tatala sona ofisa i le Tuutuuileloloto e pei ona tatala aloaia i le afiafi o le Aso Toonai ua mavae. O se tasi o faifeau Patele o le ekalesia Katoliko faatoa iu mai Roma na ia faapaiaina le ofisa lea sa ia sausau i le vaisā, ma tatalo e faamanuia le ofisa fou aemaise o le auaunaga a le kamupani o le faatino ai.
Na ia momoli ai foi faamanuiaga i le pulega ona o le tautua ua mafai ai e le atunuu ona maua se isi kamupani talatupe faamomoli e maua ai le faamāmā avega i le totogi e lafo ai seleni aemaise e toe sasaa atu foi e le Pacific Ezy Money Transfer o ana meaalofa tupe ia i latou o loo faaaogāina lana auaunaga.
O le ofisa o le kamupani sa i le fale o le Ah Mau Mall i Saleufi ua tapunia, ae ua suia atu i le Tuutuuileloloto. O loo tumau pea isi ona ofisa i le pito i tua o le fogafale i lalo o le Faletupe o Atiina‘e faafesagai ma le maketi o i‘a i Savalalo ma le ofisa i le maketi i Vaitele-tai.
O loo faaauau pea foi le tautua a ona lala poo ofisa i Salelologa, Safotu, ma Asau i le motu tele i Salafai. Na taualuga le tatalaina o le ofisa fou o le Pacific Ezy i le fiafia o le Kerisimasi a le kamupani sa faia i le Marist Sports Club i Lotopa i le afiafi lava o le Aso Toonai na tea nei.
