O le aafia o ni alii leoleo sinia se toalua, o le isi o se satini ao le isi o se taitai leoleo i ni tuua‘iga o faiga faaalatua i se suesuega o se moliaga tau taavale afi, o le pogai lea o ni moliaga o le aafia i ni faiga faaalatua (official corruption) faasaga i ia Malu o le Malo.
E lei maua se avanoa e fesiligia ai le Komesina o le Matagaluega o Leoleo le afioga Fuiavailili Egon Keil, ae o se molimau faatuatuaina mai se alii leoleo sinia na ia faailoa mai ua faamalolo lē tumau ia alii leoleo e toalua e faatali ai le aso o lo la faamasinoga. E lē o iloa poo le faamasinoga faaleoleo le Police Tribunal poo le faamasinoga o soligatulafono i Mulinuu o le a valaau ai o la moliaga.
O le mataupu o loo tuua‘ia ai ia alii leoleo e pei ona faaalia e le molimau e mafua i se pusa o meaai tuu‘aisa e faapea na ave e se faipisinisi i se tasi o leoleo ua molia ma le faamoemoe o se taui i se manaoga faapitoa o le faipisinisi e iai sona sootaga i le tagata na aveina le taavale na aafia i le faalavelave. O le faamatalaga mai a le molimau e faapea na avatu i le ofisa le avetaavale ina ia taofia ona e ‘onā tele peitai o le faatonuga a le tasi o leoleo sinia o loo molia na lē taofia ai le avetaavale ae toe tatala i tua. O le avetaavale e faigaluega i le faipisinisi na ia ave le pusa o taumafa tuu‘aisa e avea o se meaalofa mo le leoleo sinia.
E iai foi se isi mataupu o loo iai le talitonuga o le isi lea o mafuaaga o le faamalolo lē tumau o ia Malu o le Malo. E pei ona silafia le mataupu o loo suina ai e se tamā le Matagaluega o leoleo ona o le lokaina faatasi o lea tamā ma sona atalii tolu tausaga le matua. O se mataupu foi tau taavaleafi na mafua ai ona taofia uma le tamā ma lona atalii.
Ua faaalia e le leoleo sinia ua taofia lona suafa, o le faamalolo lē tumau o ia leoleo e toalua o loo faapea ona maua ai pea o la faamanuiaga tau totogi. O le Aso Faraile na tea nei na faia ai moliaga o ia leoleo ma faia ai foi ma le faaiuga a le Komesina e faamalolo lē tumau pe suspend ae faatali le faaiuga o le a oo i ai moliaga.
Molitai i le Palemia lagona lē fiafia o ni leoleo sinia
O se tasi o mataupu i le Matagaluega o leoleo o le vevesi o loto o nisi leoleo sinia i le faia o le faaiuga a le Komesina e faatino loa se siitiaga o tulaga faaleoleo poo se police promotion.
A itiiti mai e to‘a luasefulu alii ma tamaitai leoleo ua aofia i le siitiaga o tulaga faaleoleo, peitai e lei taunuu ona faatino lea tulaga i le Aso Lulu ua mavae.
O le faamatalaga mai se molimau na oo le mataupu i le Palemia ma avane ai le fautuaga e faatali se‘i mae‘a ona iloilo ni talosaga tetee poo ni apili mai nisi o leoleo faasaga i nisi o Malu o le Malo ua faamanuiaina.
Na faaalia e se molimau o se alii leoleo sinia, o le lē tausisia o aiaiga o le tulafono faaleoleo i le faia o ni siitiaga o tulaga o leoleo i le faatali muamua pe iai ni apili, na mafua ai ona savalia le ofisa o le Palemia.
O lea la ua faataatia se‘i faatali apili ona iloa ai lea o se aso o le a faatino ai lea faamoemoe tāua mo nisi o leoleo o le a siitia tulaga faaleoleo poo ranks.
