Ua lē ‘asa lava se masina ma suiga ua vaaia i le atinae pea ua faia e le Toomaga mo ē Puapuagatia ma ana paaga i le tali atu ai i le toatele ua faaauau ona i lalo o le vaavaaiga a lea Faalapotopotoga fesoasoani i totonu o Samoa.
O le vaiaso lenei ua faagasolo ai se aoaoga mo masina e tolu mo sui o le atunuu ua resitala e fia iloa le atoaga o le tomai e tausi ai tagata matutua ma tagata e iai manaoga faapitoa.
O se aoaoga ua tutu faatasi ai le Toomaga ma ana paaga mai i le Aoga o Matata Eseese a Ausetalia i le Pasefika le APTC i le faatautaiga ma e to‘a 30 lava tagatānuu o Samoa ua lesitala mo lea faamoemoe.
O loo aumai i le APTC faiaoga faapitoa mai i fafo ma totonu foi o lana aoga i Vaivase auā le faatinoga o nei aoaoga i sui eseese o le atunuu ua resitala.
Ae o le faaiuga o le vaiaso na tea nei na tatala aloaia ai foi se isi fale tele ua fausia i totonu o le lotoā a le Toomaga mo ē Puapuagatia i Tuanaimato. O lea fale tele ua fausia faapitoa i le fesoasoani a le kamupani telefoni feaveai o le Digicel Samoa, lea ua faaigoaina o le Ray of Hope.
O se fale ua patino lava mo tamaitai ua maua i le ma‘ito ona o solitulafono ua faia faasaga ia i latou, ma o le toatele ua faatali faamasinoga ua faia faasaga ia i latou ma o le toatele lava o nei teine talavou ua sauaina mai i totonu lava o o latou siosiomaga i aiga. O nisi ua faamalosia e nisi lava e fesootai i ai.
O lea la ua iai le nofoaga ua patino lava mo i latou. Ua iai le falemai faapitoa lava mo i latou ae o fale nei ua fausia auā le faamautu ai i le taimi atoa ua tauave ai le ma‘itaga lea.
Ua faafetaia e le alii Palemia, sa valaaulia e tatala aloaia lenei fale tele, lenei galuega aemaise o le auaunaga faifai pea a lenei Faalapotopotoga e tali atu ai i tagata ua manaomia se fesoasoani aemaise i latou ua sauaina ma ua sulufai mai i le Toomaga mo ē Puapuagatia mo se fesoasoani.
O le alii pule o le Digicel i le Pasefika, se alo lava o Samoa le afioga Pepe Christian Fruean na faapea ona fai ma sui o le kamupani e saunoa i le tāua o lenei fesoasoani, o le puipuiga ma le alolofa atu ai i fanau teine ua aafia i sauaga, ma o le igoa o le uso o Pepe, ia Ray lea na maliu i le tausaga na tea nei, e foliga mai o lea ua fesootai ma lenei fale fou ua faaigoaina o le Ray of Hope. O le a manatua ai foi lea alii faipisinisi i Samoa i lenei foai tele.
O le tau atoa o le galuega lenei o potu ua aofia ai ma ea malulu aemaise o potu e malolo i ai tamaitai ma gasese ai a latou taumafa, e tusa ma le $40,000 tala Samoa.
Na maua le avanoa e maimoaina ai lenei fale ma e maoae foi le tulai mai o lenei fale ua faaopoopo i nofoaga ua sulufai ma vaaia ai i latou ua sauaina ma ua moomia se fesoasoani a le Faalapotopotoga o le Toomaga mo ē Puapuagatia
