Na pulupulu ma laei le Atua silisiliese i lona lava viiga na siitia a‘e e le paia ma le mamalu o Samoa aemaise o le Ekalesia a le Voice of Christ Full Gospel i Sunshine, i le tatalaina aloaia o le uluai CD a le aufaipese i le afiafi o le Aso Faraile na tuanai atu.
O le afiafi o viiga ma pesepesega e le gata i le aufaipese a le Ekalesia, ae faapea foi nisi o Ekalesia ma le mamalu taitoatasi na fai o latou sao na matagofie naua ai le faamoemoe.
Na amataina le sauniga i le faafeiloai ma le faafetai a le tamā o le galuega le susuga ia Aliiaunoa Fagaloa Fuimaono, ma ia valaau faaaloalo ai i le susuga i le faafeagaiga ia Apouani Tapuala Unasa mo le tatalo e faapaiaina ai le aufaipese ma lo latou faamoemoe, ona faagasolo ai lea o le galuega a le fofoga o le faamoemoe le fetalaiga ia Namulauulu T. Samu.
Sa matuā faatumulia le malu i le paia lasilasi na afifio atu e molimauina ma faatau CD e pei ona faasalalauina i luga o leitio i nai vaiaso ua tuanai. O le taitai o le aufaipese o le susuga ia Fetaiai Silao na faalauiloaina le aufaipese lalelei laufofoga fiafia ma o latou suafa.
A o faagasolo a latou pesepesega o loo i la latou CD, na ia faailoa foi o pese uma na tusia ma fatuina e le susuga ia Tone Amituanai, ae o le galuega fitaituga o le pueina ma le tuufaatasia o le CD atoa na nafa ma le JJ Recording a le susuga i le faafeagaiga ia Faatasi Sanerivi.
Na maualuga atili le afiafi ona o le toatele o le Aufaigaluega Paia mai fatafaitaulaga eseese na auai, aemaise o auaunaga leitio a le Apu FM, le Fofoga o le Saolotoga ma le Fofoga o Samoa mo nei ma a taeao.
Na taualuga le afiafi i le taumafataga felanulanuai, ona saunoa ai lea o le Tiakono toeaina o le matagaluega a le VOC a Melepone le susuga ia Fiu Filiosavaii Aukuso e fai ma sui o Samoa na potopoto. O le tatalo faaiu na faia e le susuga i le faafeagaiga ia Faiumu Pio Faletuai ma ta‘ape fiafia ai le aofia ina ua tofu le tagata ma lana CD.
