E fai o le tele o isi taamilosaga o taaloga o loo faagasolo i lenei vaitaimi, ua lē masino e anoanoai o taaloga mai lea atunuu ma lea atunuu, a o taamilosaga mai nisi o atunuu. Ua lē toe mapu le aliae o atinae lelei o taaloga mai lea atunuu ma faalapotopotoga faapea foi Iuni tetele e pei o le Lakapi Liki.
O le masina fou ia Oketopa lea ua fuafuaina ai se tasi o taamilosaga ua mautinoa le aafia ai o nisi o atunuu e fā o loo aafia ai Niu Sila, Ausetalia, Egelani, ma ai iloilo ai foi ma Samoa.
O lenei taamilosaga na mafua ona tulai mai ona o le lelei faafoeina o le taamilosaga o le Ipu o le lalolagi na se‘i mavae atu nei, atoa ia ma le siitia o le tulaga i tomai o alii talavou i le taaloga lava lenei o Rugby League i lenei talutalu fou.
O nisi ia o fuafuaga mamao ina ia faatumauina pea le agaigai i luma o lenei taaloga ma faatosina ai pea tagata lagolago ma pisinisi e oo lava i alii taaalo i le taaloga i le siitia ai i tulaga faapolofesa ua iai nei.
O le taamilosaga lenei ua fuafuaina mo na o le fā lava vaiaso e faagasolo ai, ma ua talimalo ai Niu Sila ma Ausetalia i lenei tausaga 2014. O le isi vaega e pei na mafua mai ai lenei taamilosaga i le taamilosaga lea sa faatinoina i Eden Park a le Rugby League ina ua faatoa mae‘a lava le Taitoafitu i Ueligitone a le lakapi Iuni.
E mautinoa foi le faatumulia o malae taalo i lenei taamilosaga fou ua faapolokalame e amata taaloga muamua e talamaea ai o Samoa ma Egelani. O le faagasologa la lenei o taaloga:
Oketopa 26:
Egelani vs Samoa (Brisbane Ausetalia)
Novema 1:
Niu Sila vs Samoa (Whangarei Niu Sila)
Novema 2:
Ausetalia vs Egelani (Melepone Ausetalia)
Novema 8:
Niu Sila vs Egelani (Dunedin Niu Sila)
Novema 9:
Ausetalia vs Samoa (Wollongong Ausetalia)
Novema 15:
FINAL (Wespac Stadium Ueligitone Niu Sila)
Talosia le auai ai o le Toa Samoa i lenei taamilosaga ia faapena ona faaeaina ai pea le tulaga o Samoa i lenei taaloga. Ia tapuaia faiva o nei alo o le atunuu ina ia a‘e ma le manuia ma faafiafiaina ai Samoa.