Ua mae‘a i lenei vaiaso le galuega tele o le faamae‘a ai o le falemai tele o Tupua Tamasese Meaole II i Motootua. O se galuega na tutu faatasi ai le Malo o Saina ma isi paaga a le malo o Samoa i le fausia.
O le tau atoa o le falemai atoa e aofia ai le vaega muamua e $153 miliona tala Samoa. O se tupe tele ae ua vaaia le tele ma le matagofie o lenei galuega lea ua iai le faamoemoe e umi se taimi o le a faapea ona faaaogā ai.
O le vaega muamua lea sa iai potu taofia ma le vaega o taotoga faapea ai foi le nofoaga tau savali.
O le vaega lona lua o se isi fogafale tolu ua aofia ai le falemai o le mafaufau ma le aoga faaiunivesite faafomai a le Oceania lea e faatu i Samoa.
O le malo o Saina lea na tele lana fesoasoani i lenei galuega ma o le sui Amepasa o lea Malo i Samoa nei le susuga ia Liu Yang na ia tauaao atu ki o le vaega lona lua lea o lea galuega i le Minisita o le Soifua Maloloina, le afioga Tuitama Dr Talalelei Tuitama e faamatuu atu ai ma le galuega tele lenei ua tatala nei faitotoa i le mamalu o le atunuu.
Ua tele suiga o le falemai tele i Motootua e ala lea i le malupuipuia o leoleoga ina ia mautinoa le lelei pea mo se taimi umi o nei nofoaga. O le taulai a le Malo e pei ona ta‘ua e le alii Palemia i le tatalaga o lenei galuega, ia mafai e Samoa ona ausia le tulaga lelei atoatoa o le tautua faasoifua maloloina.
O le galuega fou lenei ua iai ma totoga o le maota gasegase e talitonu le taitai o le Malo o le a faaitiitia ai le numera o tagata Samoa ua siima‘i i Niu Sila ma isi atunuu ona o le lē mafai ona faatino taotoga i totonu o le atunuu.
Ta‘ua e le alii Palemia o lea ua mautu nei le fale ma meafaigaluega sa manaomia ma e tatau i fomai o Samoa ona tulai mai e faatino loa le galuega sa tele ina lē mafai ona o le tulaga tau i meafaigaluega sa lē atoatoa.
Faapea le saunoaga a le susuga Tuilaepa Lupesoliai Sailele Malielegaoi, “…ana o a‘u o se fomai i le taimi lenei, ou te maasiasi pe afai o lea lava e ave gasegase i fafo mo togafitiga, e tatau ai loa ona susunu tikeri o fomai o le tatou atunuu”.
O lana saunoaga ua ia lu‘i ai le vasega o fomai ina ia faaaogā loa le avanoa ua maua e ala i le falemai fou ma meafaigaluega ua maua mai ai ina ia fesoasoani i le faitau miliona o tala a le atunuu o loo alu i le tau sailiga o togafitiga faafomai i fafo.
O se kamupani faufale mai i le malo tele o Saina na nafa ma le fausia o lenei galuega tele, ma o le nofoaga tau savali ua see atu i le fogafale lua o le fale fou lenei a o le faletalavai o loo i le fogafale a lalo ina ia faigofie le agai i ai o le atunuu mo fualaau ma vailaau moomia i le mae‘a ai o siaki poo togafitiga foi.
O loo faaaogā lava le falemai tuai i isi vaega o le auaunaga e pei o le vaega e vaai ai fofoga ua see atu i le fale sa faaaogā e failele ma tamaitai ma‘itaga i le pito i uta o le falemai tuai ae ua faaaoga pea le nofoaga sa iai siaki a tamaitai i le tausiusiuga o le agai i Leufisa e fai ma ofisa autu o le auaunaga faafomai ma le tausi soifua.
