Pitovao Kirisimasi Foaga ma Aitaua Foaga
O le taleni pese o le meaalofa mai i le Atua, o se fuaitau e masni ona faafofoga i ai le atunuu pe a oo i se sauniga e tatala ai se galuega poo se taleni lelei ua faaalia. Ua talafeagai lelei foi lea fasi fuaitau i le susuga ia Pitovao Kirisimasi Foaga ma lona faletua ia Aitaua Foaga lea sa toe umusaina le la CD lona 2 i le afiafi o le Aso Faraile o le vaiaso ua mavae, 12 o Tesema i le hall a le aoga a Sir Keith Park i Magele.
O le ta o le 6 i le afiafi na tatala ai le faitotoa mo le mamalu o le atunuu ma amata ai loa ona pesepese le team a le Ekalesia AOG i Royal Oak. O aiganalua, o uo ma ē masani aemaise o susuga i faafeagaiga ma o latou faletua sa auai i le molimauina o lenei faamoemoe.
Na amata mea le susuga i le faafegaiga ia Matai‘a Nofoaiga i le sauniga paia e faapaiaina ai lenei CD ma saunoa ai i le upu faamalosi e toe tapue ma luitau ai lana fanau e ala i le taleni ua maua. Na saunoa le taitai o le pese, o se tasi lea lauga sili i le soifua ma le ola auauna o le tagata i le Atua.
O le pese foi na te aveesea se mafatiaga i se tagata poo ni faafitauli o loo tutupu ai. O le tele foi o fatuga ua fatu agai i uo poo mafutaga, ae o le pese i le Alii o le meaalofa sili lea ona tāua ma toe maua ai le luitau mo le isi tagata. O le fofoga o le po o le tofa ia Tiatia, ae o le tofa ia Seumanu Francis Ioane o le inisia lea sa nafa ma le faaleleia o le sound auā lava le faafofoga a le atunuu.
O le tele o pese o loo i totonu o lenei CD sa faapea lea ona usuina i lea po, sa faatinoina foi nisi o aitema e le autalavou Royal Oak, o fanau mai Tonga, faapea le susuga i le faafeagaiga ia Alo ma lona faletua. Sa faapea foi ona faatauina ai le CD muamua i le $20 ae o le CD lona 2 sa fai i lou loto fuatia ifo.
Ae na ta‘ua e le susuga i le faafeagaiga ia Matai‘a o le tupe na maua i le tatalaina o le CD muamua a le susuga ia Pitovao ma lona faletua na foai uma lava mo le Ekalesia. O se luitau tele mo i latou o loo faaaogāina le taleni pese mai le Atua.
O upu mulimuli na saunoa ai le fofoga o le po e momoli le faafetai i le mamalu o le atunuu sa auai i le patipatia o lenei faamoemoe ma faaiu ai loa i se taumafataga na saunia lava e aiganalua ma le Ekalesia.
