Ua tulimatai nei e le atunuu le aso 29 o Novema, o le po lea o le Aso Toonai le fale faafiafia o le Parataiso i Otara, i se pomu o le a pa ai, e ala i le faafiafiaga a le afioga ia Tolumaanave Misiluki Su‘a, lea ua fuafuaina e tatala aloaia ai lana MTV lona tolu talu ona ia faatinoina lenei foi taleni o pese i totonu o se ata.
O le afiafi foi lea o le a toe faafofoga ai Samoa i fatuga faamomoi loto ma le leo tagitagi o Misi faatasi ai ma le alii puupuu o Mautoatasi ma le faili o le Moonlight Boys, aemaise o le ausiva a le La o Samoa o le a faaatoatoaina le maimoa a le atunuu i lea po.
O le taimi muamua lea ua asia ai e lenei tamalii o le atunuu Aotearoa i tulaga o faafiafiaga faapenei e pei ona masani ai foi nisi alo pepese o le atunuu. O le afioga ia Tolumaanave Misiluki Su‘a ua silia nei i le 40 ana CD ua mafai ona tuufaatasia ae ua ia faatinoina foi ni ata pese e faalautele ai pea le taleni ma le meaalofa ua foaiina e le Atua i lona soifua.
O le MTV lona tolu ua faaigoaina o Lau Taleni, ma e lua ni vaega o loo mafai ona tuufaatasia i totonu o lenei ata, (1) o se polokalame na pueina e le TV3 i Samoa i le tausaga 2007 ua faaigoaina o Lau Fatuga, ma o lenei polokalame na fuafuaina lava e lenei tamalii o le atunuu, ma sa faatinoina i uta i Papaseea, ma lona lua o ni vaega na pueina i Ausetalia.
E 4 vaiaso na tapena ai e le afioga ia Tolumaanave Misiluki Su‘a lenei faamoemoe ma tuufaatasia ai loa e le susuga ia Sila Levae ma le fale puepese o le Levina Recording Studio i vaiaso e 3, o le tele o pese tuai o loo auina mai i totonu o lenei ata faatasi ai ma tausaga na tusi ma fatuina ai.
O le tofa ia Seumanu o le a fai ma fofoga o le po ma o le a faatau ai foi ma le ata i le $25.00 ma e aofia ai ma le ulufale. Ua mae‘a nei le tatalaina i Ausetalia, lea sa ta‘ua ai e Tolumaanave le faatumulia ai foi o le atunuu o loo aumau i lea itu o le kelope na agai atu ma lagolago lona faamoemoe.
