O Iuni o le tausaga e 2011 na amata ai le Ekalesia Papatiso fou i Nuu. O Iuni o le tausaga nei na atoa ai le fā tausaga o le aulotu lenei ae ua mae‘a lo latou malumalu fou na umusa ma faaulufale i le Aso Toonai na tea nei le aso 29 o Novema 2014.
Na amata le lotu o to‘agaogao a o le taimi lenei e pei ona molimau mai le susuga i le faafeagaiga le susuga i le Toeaina Seupule Faapale o loo tausia ma lona faletua le ekalesia, ua silia i le to‘a selau tagata lolotu.
O isi tagata e lolotu tau savali mamao ua faatu le latou lotu fou i Tanumapua ma ua agai ane i ai e latalata. “Ou te iloa le talia e tagata o si a matou foi galuega ona e ese lona faatinoga i le itu i meafai ma le faatinoga o le ola tapuai”.
O le saunoaga lea a le susuga Seupule ona o lana molimau, ua silasila tagata lolotu e ese foi le tulaga o loo faatino ai le galuega. O le fuafuaina o le Malumalu fou ua umusa sa saili se nonogatupe e mokesi i le NPF maua ai le $100,000.
Peitai na saili atu foi ni fesoasoani i fafo i isi aulotu Papatiso ma maua ai le fesoasoani faatasi ai ma le foai mai se aulotu Papatiso i Peletania. O le tau o le malumalu e luaselau afe ma ona tupu ae o loo iai ni mea laiti o le malumalu e lei mae‘a.
“O le fatinoga lava ia o le galuega e lē manao le ekalesia e tigaina tagata, ae e saili auala talafeagai e mafai ai ona faatupe se galuega tele faapea”. Na faaalia e le susuga i le faifeau Toeaina o loo taitaia le galuega o Lotu Papatiso Samoa i Niu Sila ma Samoa le susuga Faasooletalalelei Auvaa, o le malumau muamua lea i Samoa ua faatupe i se fesoasoani mai le ekalesia aoao aemaise le ekalesia Papatiso i Wainuiomata i Ueligitone Niu Sila sa galulue ai le susuga Seupule ma lona faletua a o lei filifilia e galulue i le galuega fou i Nuu.
E le gata i fesoasoani mai fafo sa faatupe ai le galuega ae na molimau mai le susuga Seupule e iai foi tagata o lana aulotu na tauofo atu mo le faia o isi vaega o le galuega.
Ua iva nei aulotu o le ekalesia Papatiso i Samoa lea e aofia ai aulotu o le ekalesia Papatiso Manumalo peitai ua faaalia e Seupule e iai se aulotu fou ua fuafua e faatu i se tasi o afioaga o le itumalo o Falealili, ma afai ae taunuu lea fuafuaga ona maua lea o le sefulu o aulotu.
E talitonu le susuga i le toeaina ia Faasooletalalelei Auvaa ua foliga ua vave ona tupu ma ola le ekalesia i Samoa, ona o le fesoasoani a le ekalesia Papatiso aoao na faatupe ai le faleaoga tulagalua o le nuu o Satitoa na faaleagaina i le sunami.
“Ou te lagona o le isi lava lea mafuaaga o le vave tupu o le galuega, e viia lava le Atua i mea lelei na te faia mo lana fanau”. Na faaiuina le umusaga ma le faaulufale o le malumau fou o Nuu i le taumafataga felanulanuai na saunia e le aulotu. Sa auai nisi o faafeagaia mai nisi o fata faitaulaga e pei o le susuga Nuuausala Si‘utaia ma le faletua faapea aiga ma uo sa valaaulia e le aulotu latou te molimauina le galuega ua mae‘a.
