Tatala le maketi fou a Ah Liki

Ua tatala se maketi fou mo fua o faaeleeleaga i Taufusi i le sā‘oga lea e agai atu i le magatolu i Vaimea. O le nofoaga lenei ua faaigoaina o le Taufusi Market ua fausia e le alii o Ben Ah Liki, o se alo faasino ia Lemalu Ray Ah Liki, lea e pulea le faletupe o le Samoa Commercial Bank.
Fai mai le alii Palemia i le tatalaga o lenei faamoemoe, ana iloa lava o se faanaunautaiga lea o faipisinisi i totonu o le atunuu e fau lava e i latou maketi mo le aufai faatoaga, atonu ua faasao le tupe lea ua faamautu mo le maketi tele i Fugalei lea lava e lei tino mai i le taimi nei ona o lea faatoa tau amata ona fausia.
O lenei maketi e silia ma le $300,000 talā Samoa lona faatupeina i ni poloka e 140 lea o loo fuafua e faamae‘aina ma faaavanoa mo le aufaifaatoaga e faatau ai a latou fua o faaeleeleaga.
O loo tumutumu lava le atunuu i le nofoaga lea ua ave i ai e Toleafoa Faafisi i Fugalei, e ui i le palapalā ma le pefua, ae ua faatutū ai lava poloka mo le faatauga o meamata atoa ai fualaau faisua ma fualaau ‘aina i le mamalu o le atunuu.
O lea ua tau faaiuiu galuega o le maketi tele a le kamupani o Amau i Saleufi ma o loo iai foi fale ua saunia e Maualaivao Pat Ah Him auā lava faatauga a le aufaifaatoaga.
Ae o loo iai foi le maketi ua saunia i le fanua o Vaai lea o loo fesagai ma le nofoaga o le maketi a le malo lea e tau fausia i Fugalei.
O le Taufusi Market la e $10 i le aso, i le poloka e tasi mo le vaiaso amata lenei ae oo atu i le vaiaso fou ua sii i le $15 i le poloka i le aso. O le tupe lea e totogi e le faifaatoaga e faatau ai ana fua o faaeleeleaga.
E $10 o loo totogi i le aso i le nofoaga lea a Toleafoa Faafisi, $10 i le aso Maualaivao Pat Ah Him. O le maketi ua fuafua e tatala ia Tesema a Ah Mau e $15 i le poloka i le aso e tasi.
O loo tumutumu lava le atunuu i luma ane o le nofoaga lea ua siomia e toe fausia ai le maketi i Fugalei a le malo ma e foliga mai o le taugofie o le poloka lea e mafua ai lava ona tumau tagata e ui e lē o malu ma e timuia lava pe a sui le tau.
Faaalia e le alii Palemia e aogā faiga faatauvaga e ono suia ai le tupe e faaalu a le aufaifaatoaga ae o le tulaga lea e foliga mai o loo faatalitali lava le toatele i le maketi a le malo lea e $5 i le poloka i le aso e tasi e totogi e le faifaatoaga.