Toe laga finauga o le Aso Fitu

O le tatala aloaia o le fanua e 3 eka a le Ekalesia Aso Fitu Samoa Tutoatasi (SISDAC) i Siusega i le vaiaso na tea nei na toe laga ai e le taitai o lea Ekalesia, o Pastor Uili Papu le tatau ona sui o le igoa o le Ekalesia Aso Fitu o le Toe Afio Mai i Samoa nei.
O le mau a Pastor Uili Papu, e lē tatau ona toe faaaogā e le SDA le igoa o le Aso Fitu leaga o lea ua faatautaia ana sauniga lotu ma le faamamalu o lana sapati i le Aso Sa. I le kalena a le atunuu na ia faaalia o le Aso Sa o le Aso Muamua.
“E tatau la ona sui le igoa, o le Ekalesia Aso Muamua o le Toe Afio Mai ae lē o le Ekalesia Aso Fitu o le Toe Afio Mai,” o le saunoaga lea a Pastor Uili Papu.
Ta‘ua e le taitai o le SISDAC, ona pau lea o le ekalesia e faaaogā le kalena a Samoa i le vaiaso atoa ae a oo loa i le aso Sapati ua o latou toso mai le kalena a Amerika Samoa lea e tuai i le aso e tasi ma faaaogā.
O le suiga o le aso a Samoa nei na faalauiloa ai e le Ekalesia o le Aso Fitu o le toe Afio Mai, o le a agai i latou i le faamamalu o le Aso Sa auā ana tapuaiga.
O lea foi ua faamamalu i Tonga le Aso Sa e faatino ai ana tapuaiga, e lē gata i lea o Kiripati, Tuvalu ma le Atu Kuki.
O le mau a le Ekalesia Aso Fitu o le Toe Afio Mai, o ā lava finauga o lenei mataupu o loo gasolo sa‘o lava i latou i le tulaga ua iai le suiga a le atunuu ma lana kalena ma e lē toe tau tuu fua i tua le taimi o le Sapati ua o latou faamamalu.
O loo faaauau lava la finauga o le aso ma na ta‘ua e Pastor Uili Papu, e lē o se tau faaleaga i le ekalesia Aso Fitu o le Toe Afio Mai, ae o le faatāua ua tatau ona ave i le aso leaga e iai le tāua i le talitonuga faalelotu lava ia. O le Aso Fitu o le Aso Toonai ae lē o le Aso Sa. O le Aso Sa o le aso muamua ma e faigofie lava i le vaavaai a le Ekalesia Aso Fitu Samoa Tutoatasi lea tulaga.
E lē o iai se manatu o le Ekalesia Aso Fitu o le toe afio mai e faatautee foi i latou ae o le finagalo lava o le ekalesia, e leai se isi faamalamalamaga e mafai ona fai mai e talia e le SISDAC ae o loo agai lava le latou ekalesia i le suiga o loo vaaia foi i isi ona lālā i isi atunuu o le Pasefika lea ua faamamalu lava le latou Sapati i Aso Sa.
O le mau a Pastor Uili Solofa, le taitai o le Ekalesia Aso Fitu o le toe Afio Mai, e lē o iai se manatu e tali mai i le lagalaga pea e le SISDAC o lenei mataupu ona o mataupu nei e faatatau lava i le lotoifale o le ekalesia ma o le SDA o le ekalesia faavae lea ma ua talia foi e taitai mai i Amerika ma isi atunuu tetele o lenei lotu le suiga ua o latou faatautaia, o iina na ta‘ua e Pastor Uili Solofa e faavae mai ai le latou faaauau o le latou faamamalu o suiga ua iai nei.