Ua lua tausaga talu ona ta‘uta‘u le tatalaga o le faleoloa tele (Supermarket) a le aiga o Amau (Chan Mow) i Apia. O le supamaketi muamua lava lea a se aiga i Samoa na faatu i le atunuu.
O se galuega ua see mai ai lea faleola i Matafele lea sa iai le faleoloa o BP (Burns Philip) faafesagai ma le uati i le taulaga ae fau le fale tele fou i Taufusi e faafesagai ma le nofoaga siiatoa a le aiga lava lenei.
E lei iai lava nisi o le sauniga auā le tatalaga o lenei galuega tele, na o le tina lava o le aiga, o Salote Amau ma le fanau, ma o le tina lenei ma lana tautua ma lona toalua e ala i auaunaga faafaleoloa, lea ua 89 tausaga o lona matua ae o loo tu lava i le faleoloa sa iai ma le faamoemoe ina ia faaauau lana tautua i le atunuu i le faleoloa fou.
E tolu fogafale o le faleoloa fou. O le fogafale alalo lea sa iai le fuafuaga o le a fai ai poloka o le maketi ae talu ai o le lua o tausaga talu ai na folafola ai ia suiga, ae ua lē taunuu ma ua tele atu isi maketi ua fausia i vaega eseese o le taulaga, o lea ua vaevae ai lava le faleoloa, i taumafa i le pito i lalo, o le vaega o lavalava ma meaafale ua faasoa i ai isi fogafale i luga o lea maota tele.
Ua iai foi ma se faasitepu e alu i le uila i lea fale tele. Faaalia e le alii pule, ia Patrick Komisi Chan Mow, o le galuega e lē mafai ona ta‘u mai se tau atoa ona e lei mae‘a isi galuega na fuafua e faamae‘a ai le faleoloa a le latou aiga.
O le mafuaaga o le toso umi o le galuega ona o se feeseeseaiga ma le konekarate na ave i ai le galuega e faatino. O lea ua i luma o le faamasinoga lea mataupu ona ua tuua‘ia e le aiga o Amau lea konekarate i le lē uma o le galuega ae ua leai se tupe na ave i le konakarate e fau atoa ai le supamaketi.
E lei mae‘a la le mataupu i luma o le faamasinoga ae ua iai le manaoga o le aiga ina ia tatala pea le vaega ua uma o lea faleoloa.
Na toe manatua e le alii pule lona tamā o se tamalii Saina na galue i Samoa nei ae faaipoipo atu ai i lo latou tina, ma o pisinisi a lenei aiga na amata mai lava i le faleaiga o kekepuaa ma faasolo ai i isi taumafa.
O le taimi lenei ua lē gata ina iai faleaiga, faletalimalo, o faleoloa ma maota ua faaaogā e pisinisi e pei o le Chandra House ma o fanau foi ua faatu lava a latou pisinisi eseese i soo se itu o le atunuu.
