Ua mae‘a i le vaiaso lenei se galuega a le alii kuka lauiloa o Niu Sila ia Robert Oliver ua faamauina ai nisi o loo gasesea taumafa i faleaiga ma faletalimalo o Samoa ma le faaaogāina o fua o faaeleeleaga ma isi lava taumafa o loo maua i Samoa e gaosi ai nisi o meatausami ua aogā i le soifua maloloina ma maualuga foi lona tofo i lenei itu o le lalolagi.
O se galuega ua faafaigaluega ai lenei alii e le Iuni a Europa na te faatino mo atumotu eseese o le Pasefika. O Oliver e pei ona silafia ua lua lelei tusi ua ia lomia ma faamaumau ai le tele o taumafa a Samoa aemaise o lana unai lea ina ia agai lava tagata Samoa e faaaogā mea ua maua i Samoa mo le gasesega o nisi o taumafa ua mafai lava ona agai i tauvaga faavaomalo i le itu o meatausami.
Faaalia e lenei alii o le faamauina o galuega a kuka i atunuu e pei o Samoa o le a mafai ai ona faalautele atu taumafa a Samoa i isi atunuu ma o se auala foi lea e agai ai lava tagata o Samoa e faaaogā fua o ana faatoaga ma togalaau, o aano o manufasi o loo maua i le atunuu ina ia mafai ai ona faaitiitia le tupe o loo faaalu i tausaga uma mai i Samoa e tau aumai ai fua o faaeleelaga mai i fafo ina ia taumafai e gaosi taumafa mo tagata tafafao asiasi mai i fafo.
O lea la ua faagasolo faamaumauga a lenei alii i faletalimalo eseese o Samoa ma ua faapea foi ona iai lona faamoemoe a mae‘a ona aoina uma nei faamaumauga o le a toe foi mai i Samoa ia Tesema mo le faatino ai o ni aoaoga ma faamanino auiliili ai lana lipoti o le a avatu i le Iuni o Europa.
O le unai foi o lenei taumafaiga ua faia lava ina ia mafai ona ausia e atumotu laiti o le itulagi le itu lea ua lava taumafa maua i atumotu taitasi e tali atu ai i suiga ogaoga o le tau ua aafia ai le tele o le Pasefika i lenei vaitaimi.
