Ua mae‘a se tasi o galuega tele i atinae tau i aoaoga a le atunuu i le itumalo o Falealili ma o se galuega ua talafeagai le mae‘a ma le toe a‘e ai o aoga a le fanau mo lenei tausaga.
O le aso ananafi (Aso Gafua) lea na tatala ai faitotoa o le faleaoga lea ua toe fausia i le afioaga o Vaovai Falealiili ma o se aoga ua faapea ona agai i ai, e le gata i fanau laiti a lea afioaga ae ua aooga ai foi ma fanau o le afioaga o Matautu Falealili.
O le galuega sa fesoasoani malosi i ai le malo o Iapani e ala i lona ofisa i Samoa nei. O se vaega lenei o le fesoasoani a le malo ma tagata o Iapani mo le atinae o nuu i tua ma e tele lava la ina alu i aoga.
Faaalia e se tasi o sui a faipule o le itumalo, ia Tusa Tupuola Misi na ave le talosaga ia Iapani ma na sau ai le tali e $220,000 tala Samoa. O se seleni tele na faafetaia e lenei itumalo peitai sa manaomia le sao o afioaga lea e tusa ma le 15 pasene (%) o le tau atoa o le galuega. Faaalia e Tusa na fai sailigatupe e ala i tausala ma le bingo ma maua ai loa le seleni poo le sao o afioaga e lua mo lenei galuega ua aofia ai potu aoga, o le potu o faiaoga ma le ofisa.
O le Aso Faraile la na tea atu nei lea sa faatasi uma ai loa sui o le Malo o Iapani, sui o le Malo o Samoa atoa ai le itumalo e faafetaia le Atua i le faasoa ma le fesoasoani na maua ua mafai ona tulai mai ai lea galuega tele e pei ona faapaiaina i le faaiuga o le vaiaso.
O le faamatalaga a le sui a faipule e toeitiiti lava oo i le to‘a 200 le aofai o fanau a Vaovai atoa ai Matautu o loo aooga i le aoga lea e i Vaovai ma o le faaleagaina i le afā o Eveni o le 2012 na molimauina ai le tele o vaega o le faleaoga na faaleagaina.
O le faafetai a le Malo o Samoa na fofogaina e le afioga i le Alii Palemia, le susuga Tuilaepa Lupesoliai Sailele Malielegaoi ma o ia foi na toe lapatai i mātua aemaise afioaga e lua o loo ua faaaogāina nei faleaoga ina ia unai fanau e agai i aoga ma ia faamalosia lea tulaga e le komiti a le nuu. E le gata i lea o mātua ina ia mautinoa le malosi o le lagolago e ave i fanau.
O le unai foi lea a le amepasa o Iapani i Samoa nei, ia Tuimaugaoalii Kazimaza Shibuta, i le tāua o le aoaoina lelei o fanau a le atunuu ma le lagolago pea e Iapani o atinae tau aoaoga o loo nafa ma le malo o Samoa.
E silia i le 10 aoga tulagalua i Samoa sa aofia i fesoasoani faapea i le tausaga na tea nei ma o se tasi o afioaga o Manunu lea lava na faaee ai loa ma le suafa matai o Tuimaugaoalii i lea taitai o le malo o Iapani o loo galue mo lona atunuu i Samoa nei.
