Ua silia i le 20 tausaga o avanoa le nofoa o Tavita i le fale Vaimauga e faasino i le afioaga o Moataa i le afio o le Matua o Tofaeono, le afifio o Asi ma Patu faapea fetalaiga i Tootoo, Fuata ma Tamapua faapea Manogiamanu.
O ni tausaga e tele sa avanoa ai le suafa ina ua tuumalo le afioga Tofaeono Tile sa umia le tasi lea o suafa tāua ma maualuga o le Vaimauga aemaise o Samoa atoa. O le taeao sesegi o le Aso Toonai na tea nei 24 o Ianuari 2015, na faatumulia ai le afioaga i ona paia ma mamalu aemaise o le itumalo o le Vaimauga tainane o malo usu mai tulimanu eseese o Samoa sa auai e tapuaia le faatotu Tupu o le suafa Tofaeono.
E pei ona silafia o faamasinoga ua mae‘a sa lotea ai upu fai o le suafa i ona itu tetele ma itu taulagi i le mamalu o suli ma feoi o le suafa, na aumai ai le finagalo o le faamasinoga ua lua nofo i le suafa Tofaeono i le Vaimauga, lea ua mae‘a ona faaee ai papa o le suafa i le afioga Tofaeono Vui Leavasa i Vaiala, a o lea ua faatoa faaee le suafa Tofaeono i Moataa e pei ona filifilia i ai Tofaeono Iupati Fuatai.
O le usu a lele a le nuu ma le itumalo ma Samoa atoa na tasi moemoe le sivaloa ma le faatau paia, e fetalai le tofa Tamapua e faapaia le faanofo Tupu o le Tofaeono.
E leai se itu o Samoa e lei pa‘i i ai le fetalaiga ma le tanoa a Tamapua auā o aso faapea, o se aso fiafia i aiga ma nuu ua pale se tasi i se suafa maualuga e faaeaea i ai ma tausia mamalu o aiga ma nuu.
Na maua le avanoa e fesiligia ai le afioga i le nofo le matua o Tofaeono Iupati e tusa ma lona valaauina e umia le suafa ma tausi le aiga aemaise o le va ma le nuu, o le itumalo a o le ekalesia. “Ou te faafetai i lo matou aiga i le faaaloalo, ae sa ou teena le manao o lo matou aiga ona ua ou matua o lea ua 64 o‘u tausaga, peitai ua leai nisi o aiga le mafuaaga ua ou talia ai le valaau e feagai ma tiute faamatai i le suafa Tofaeono o lo matou aiga ma le nuu”.
Na alo le aiga e faatino faaaloalo maualuluga e lē gata o le aufaigaluega a le Atua, a o Tupu ma E‘e o le nuu ma le Itumalo sa auai. Sa auai le afioga Patu Falefatu Sapolu, le afioga Patu Ativalu Togi, le afioga Patu Sola Siaosi, ma le afioga Tofaeono Vui Leavasa.
Sa auai foi afioga Asi Tuiataga Semisi, o Asi Keve, ma Asi Leuluaialii Peleiupu Fuatai, e lei leva ona faaee i ai le suafa Asi, ma o se tasi o uso tuofe o le afioga i le faafotu Tupu fou i le suafa Tofaeono.
Na tatala Ie o le Malo poo le toga paia, o palapala a malo ma seleni sa teu ai le nuu ma le itumalo e le aiga o le afioga i le Matua ia Tofaeono Iupati.
Na molimauina le lima malosi o aiga ona sa na o le leo o le fiafia na faalogoina, ua fetaui nai toga ma seleni ma le Aso Sa aemaise o isi fuafuaga masani faaleaganuu. Ia manuia le nofo fou.
