O aso e taugalemu ai ma aso e lē taugalemu ai, peitai o se aso ua tago i ula tepa i ula ina ua lalago faatasi fanau aemaise tauaiga o le tina matua o Pu‘e Tiumalumatua F. Lasei e tatala aloaia lona maa faamanatu ina ua atoa ai le tausaga talu ona tuua le malo ma motusia le mafutaga mafanafana, lea na faataunuuina le talaga teu i le Aso Gafua, 6 Iuni 2011.
E faigata le afio o le Sa‘oalii, alalata‘i Vaili o le tootoo o Ma‘auga ma Nuuausala, o le laau na fausia, le lauti na laulelei ma le vai na lepa ma le mamalu i le Faleaana.
Ae tainane le paia o le aiga Sa Tuala auā le afio o laua suafa o Lemalu ma Le Mamea ma lo la fale na toesea, ae tainane foi le lavasii uta ma le lavasii tai, le itu launiu nofo ituaiga Tuisa Vailuu ma le mamalu ia Leulumoega.
O le sauniga lotu puupuu i lona fanuamaliu i Avonhead sa taitaia e le Tausi Matagaluega, Rev Ale Palelei, sa faatasia ai faifeau mālōlō faapea le matagaluega mai Kalaiesetete na mafai ona auai aemaise fanau ma le mamalu o le aiga.
O nisi o alo na lē mafai ona auai e pei o lana taulaga soifua o loo galue i Samoa le faletua o Niusila Mataio faapea Fofoa Lasei o loo toesea, peitai o se auaiga e faamanuiaina i le toatele naua o le au matutua, o fanau tupulaga ma ē o tau totogo a‘e.
E pei ona tomatauina e le taitai o le sauniga, na saunoa Ale Palelei, ua tatala le falaula, o le ula o le alofa na su‘iina e le tina lea ua tuufaasolo mai i lana fanau, ua lē toe iai se faanoanoa ae fiafia tagata uma ma ia faaaogā le tuualalo agamalu a le loomatua, auā e gase toa ae ola pea pule.
Na tatala aloaia le maa faamanatu lea ua tuufaatasia ai ma le tamā e pei ona muamua atu, ma faapea ona lauina saafiafiga a le fanau o loo mamanu ai.
Na tuumuli atu le aofia i le Riccarton Hall e tusa ma le valaaulia faaaloalo a le fetalaiga Falefa Fetu mo le taumafataga sautualasi na saunia e le mamalu o le aiga.
Na faapea foi ona tauaaoina e le aiga auā lava pelega o le tina ni faaaloaloga faatamalii mo le Tausi Matagaluega, faifeau mālōlō ma faatofusia foi le mamalu na auai i nai teutusi auā le aso mālōlō e pei ona fetalai i ai le fetalaiga Manumailagi Fetu.
Ua logo i tino matagi lelei, ua malie le suavasele ua titi manu ua lava manu i lau faaaloalo faatupu ma o le tofa Tuisamau, Fata Alaese sa tali fuaitau e fai ma sui o le matagaluega. E gase i le Atua le soifuaga o Pu‘e Tiumalu Fetu Lasei, ae ola pea le faatuatua i le auaunaga a le fanau ua tuua.
