E lētioa foi a matagofe tapenaga a le nofo a alo ma o latou aiga i le sauniga faapitoa mo o latou mātua, le susuga i le Faaululuga o le Matagaluega Ekalesia Faapotopotoga a le Atua poo le A.O.G Sydney, Pastor Lago Faatasi ma lona faletua o Tofoitino, lea na molimauina e le sui o le tatou nusipepa.
O tapenaga a le fanau, e faatino ai lo latou fiafia ona o le masina o Me i lenei tausaga e lua ni aso faapitoa mo o latou mātua, na faailogaina faatasi, i le Aso Sa, i le nofoaga tutotonu o le Ekalesia, o loo iai faatasi le malumalu paia ma le hall.
Ua aulia mai e lo latou tina le 60 tausaga o lona soifuaga. O le faletua ia Tofoitino mai le afioaga o Salimu Fagaloa na soifua mai ia Me 6, 1951, ae o le tele o lona olaga talavou na aumau ai i Papaloloa, Vailima ma ona tuaa o Vaafusuaga ma Maimau Foai.
O lona alii Pastor Lago Faatasi Polutele, mai le afioaga o Saleimoa, na faapea foi ona tele lona soifuaga aumau i Leifiifi. O ona tuaa le afioga ia Polutele ma Taemoo Sapa‘u. O Pastor Lago Faatasi ma le faletua o Tofoitino na a‘oa‘oina uma i laua, i le Kolisi o Maluafou, atonu o inā na masani mai ai. Na osia le feagaiga poo le tautoga i le aso 27 o Me 1971 i Samoa lava.
Ua faamanuia le Atua i lo la aiga, ua mautu ma tulelei o la alo, o tamaitai e toafā ma alii e toaono. E iai foi ma nai o la alo na la vaetamaina, ina ua fai i lagi le folauga a si o latou tina, le tuafafine o le faafeagaiga. E toatolu tamaitai ma alii e toafā, tuufatasiga o a latou fanau, poo fanau a fanau ua maua ai le 14 o tamaiti.
O le aso 22 o Tesema 1989, na amata ai ona tautua e avea ma faafeagaiga.
O Parramatta le uluai Ekalesia na la tausiaina, e atoa le tausaga o tumau ai, faato‘ā siitia mai ai i Mt Druitt i le 1991.
A fuafua atu, o lea foi ua atoa le 20 tausaga o tautiga ma punouai i le leoleoina o le lafu mamoe a le Ekalesia Assembly of God i Sydney.
O le 1995 seia oo mai i le taimi nei, o loo tauave pea e lana Susuga ma le faletua Tofiga o le Taitai Aoao Matagaluega a Sydney. Ua lima Ekalesia i Brisbane, lima Melbourne ma le sefulufā i totonu lava o Sydney. Ua lauolaola le galuega, ona na faavaeina o la olaga i se papa mautu poo le faamoemoe atu i le Atua e pola puipui i lo la aiga.
Ua mautinoa ma ua faapupulaina le alofa mutimutivale o le Silisiliese, e lē gata i le soifua faaopoopoina o le faletua, ae ua metotia pe ofoofogia le tautoga poo le alofa tumau o i laua, lea ua 40 tausaga o I Do Anything For You.
Na mae‘a le sauniga lotu ona sosoo lea ma le taumafataga na saunia e le nofo a alo. E matagofie le faagaeetia o le tausi matua, o fanau, ona e muliga le reception centre i le teuga o le hall auā aso faamanatu mo o latou mātua. Maualuga faaaloaloga na maau i ai alo o le faafeagaiga ma le faletua.
Toe faamanuia le Atua mo nisi tausaga se tele mo oulua soifua tautua, aemaise ia toe tului ma se isi 40 tausaga o le lua tautoga.
