Tatala i tua, ae tetee pea i le fasiotia o le avetaxi

Ua faia le faaiuga a le Faamasinoga e tauala mai i le afioga i le Faamasino Sili, Patu Tiavaasue Falefatu Sapolu, e tatala ai i tua ni alii se toalua lea o loo masalomia o laua lava nei na fasiotia se tama avetasi i Mulifanua.
E pei ona silafia, o lea faalavelave na maliu ai le tama o Ofisa o Moamoa ma Leulumoega i le po o le Aso Toonai 23 Me 2009.
Sa umi o tu le taxi a lenei tama i autafa o le auala pe tusa lea ma le 100 mita le va mai le faitotoa o le Faletalimalo o Aggie Greys i Mulifanaua. O se alii e masani i lea tama na ia iloa ua fai lava si umi o tu le taxi, o lea na ia lipotia ai loa i le Ofisa o Leoleo i Faleolo.
Na oo atu leoleo ma suesueina lea taavale, ma maua ai Ofisa o maliu i tua o le keli o lana taxi, ma o loo saisai lona fofoga ma lona tino atoa i ieie.
O nei la alii e toalua o loo masalomia, o Tafiga Taupauna e 24 tausaga mai Satapuala, o loo tulai mo ia le alii loia o Ameperosa Roma, ma Uati Vaifale o Leauvaa, o loo tulai ai le alii loia o Semi Leung Wai.
E lua moliaga o le fasioti tagata faamoemoeina o loo molia ai nei alii, ma ua faaui i tua le isi moliaga e tasi. O alii loia lava e toalua o loo tulai mo nei alii, sa talosagaina le Faamasinoga mo se avnoa e tatala ai i tua nei alii, ma o loo faapea ona lelei ma malupuipuia i laua i le vaaiga a o la aiga.
E ui i se popolega o le faamasinoga, ae e faataua tele foi e le faamasinoga le aia tatau a le tagata, ma le isi itu e le faapea ua faamaonia le solitulafono. O loo masalomia i laua i ni masalosaloga e ala i suesuega a leoleo, na mafua ai ona taofia i laua ma faia ni la faamatalaga e agai tonu i ai le suesueina o le maliu o Ofisa. Ona faatoa iloa moni ai lea o le auro i le afi, pe a maea le faamasinoga ma maua le iuga. O le faaiuga a le faamasinoga ua tatala ai i tua nei alii, faatasi ma poloaiga a le faamasinoga ma tuutuuga e ao ona usiusitai i ai.
O le alii o Uati Vaifale o Leauvaa, ua poloaina e le Faamasinoga e nofo i le tina o lona tina i Tuanai, atoa ma le vaavaaiga a le susuga i le faafeagaiga o Matauaina Koria. O le a saini i le Ofisa o Leoleo i Apia i Aso Lua ma Aso Faraile, a o lei taina le 12:00 i le aoauli.
O le alii o Tafiga Taupauna, o le a nofo i lona aiga i Satapuala. O le a faapea foi ona saini i le Ofisa o Leoleo i Faleolo i Aso Lua ma Aso Faraile a o lei taina le 12:00 i le aoauli.
Ua tolopo ai foi le la Faamasinoga i le aso muamua o Fepuari 2010, e fofogaina ai molimau a leoleo aua le suesueina o lea mataupu.