Ua salalau faamatalaga ma manatu faaalia o nisi i Samoa ua laumanuia ai valoaga e faapea ua vaaia tau ataata o le malepe ma le toilalo o le faigamalo a le HRPP ina ua faaleaogaina e le faamasinoga le faaiuga a le Fofoga Fetalai na soloia ai nofoa e iva o le Tautua Samoa party. Ua faaalia e ia finagalo o se toilalo popo mataga lea o le HRPP talu ona faavae ma tulai i le taitaiga o le Malo ma le atunuu i le silia nei ma le 20 tausaga.
O sui o vaega faaupufai o loo tapena i le palota tele o le 2011 o loo mapuna mai ai lagona nei, ona o le latou mau o le faatoa malepe lea o le mamalu o le Palemene aemaise o le ofisa o le Fofoga Fetalai i se faaiuga e soloia ni nofoa o le palemene, ae taualuga i se faamasinoga na fesiligia ai le amiotonu ua solipala ai le pule tutasi a le Palemene o loo umia e le Fofoga Fetalai.
Talu mai le aso na faia ai le faaiuga e soloia nofoa e iva o le Palemene, sa fesiligia e le tusitala nisi o sui faipule o le HRPP i ni o latou lagona faaalia. O nisi faipule e le fia tali mai na o le savavali punou, a o isi e tali mai i le laufofoga fiafia ma faapea mai, “Se ua ka leiloa le sa’o o legei mea”. Ae o se tasi faipule talavou na ia faaalia e uma loia o le lalolagi e leai se isi na te mafai ona faamatala le faaiuga a le Fofoga o le fono. Sa soisoi foi lea faipule ma lulu lona ao e foliga e te’i ma le talitonu i le tulaga na oo i ai sui faipule e toaiva ua toe foi nei i nofoa o o latou itumalo pe a toe tauaofia le Palemene i le masina fou o Aukuso.
Fono le HRPP
Na talo se fono faafuasei a le faafaletui o le HRPP ina ua maea ona aumai le faaiuga a le faamasinoga ua solipala ai le iuga a le Fofoga Fetalai. O le fono lea e pei ona faaalia e ni molimau, sa faaalia ai e le taitai o le vaega faaupufai lona lagolagoina ma le atoatoa o le faaiuga na faia e le Fofoga o le fono le tofa Tolofuaivalelei Falemoe Lei’ataua, peitai na taua e se faipule o le HRPP e iai sui o le faafaletui na faaleo ai o latou lagona le fiafia i le faaiuga, peitai na avea lea ma mafuaaga o le taofi o le fefaaaliga o lagona ma finagalo ile mataupu. Na faaalia e le sui lea o le pati sa le tatau ona taloina fua se fono a le vaega faaupufai ona o le mataupu i le faaiuga a le Fofoga Fetalai. Aisea o le a fono ai fua le pati, ae le tuu pea i le Fofoga Fetalai lana faaiuga ua nini atu ai fua ma matou”, o le lafoga lea a le sui faipule ua le finagalo e faailoa lona suafa. Sa faaleo se finagalo le fiafia o se isi faipule o lea pati ina ua uma le faaiuga a le Fofoga Fetalai. O lana faamatalaga o ia ua matua inoino lava i lea faaiuga.
Foua le taitaiga o le pati
Ua silafia e le atunuu ua lalata mai foi le isi palota tele a le atunuu i le tausaga e 2011, ma ua iai le talitonuga o nisi o le mataupu lenei o le a avea ma tulaga e ono foua ai le taitaiga o le vaega faaupufai o loo seei ai le faipule o le itumalo o Lepa. Ua faapea mai nisi o faipule o le pati, o loo iai nisi o faipule sinia o loo foufou e tauave le taitaiga o le HRPP o loo faaosoina faamatalaga e mimilo ese ai le mea moni ma tupu ai lagona tetee o nisi i le taitai ona o lona lagolago i le faaiuga a le Fofoga Fetalai. O loo faigata ona iloa poo ai tonu ia sui faipule o loo foufou e fia avea ma taitai, ae peitai ua oo mai i le tusitala suafa o nisi o ia faipule matutua o le a le mafai ona faailoaina mo le taimi nei. O le a tulimatai foi e le toatele o le atunuu e lagolagoina le HRPP poo ai nisi o loo fia ausia lea tulaga, aua e ao ona fua se filifiliga o se isi taitai fou i le taunuuga o le a iai le palota o le 2011.
O loo tetee le Palemia o tala ua lipotia ma salalau solo o ni faamatalaga e le moni. O lana fautuaga ia aua nei toe faaaogaina e tusitala tala a sui faipule o lana vaega faaupufai ona o ni faamatalaga taufaavalea ae le sao. O le failautusi foi o le vaega faaupufai na ave sana tusi ae le saini ai lona suafa i se tasi o nusipepa i Samoa ua faasea ai i le lipotia o tala e matua sese lava. O lana faamatalaga i le nusipepa o loo faanoanoa le pati i le faaiuga a le faamasinoga ae e le o tetee faipule o le HRPP i le faaiuga a le Fofoga Fetalai. O le faamatalaga a se tasi o faipule o le HRPP na fesiligia e le tusitala e faapea, na pau lea o le ituaiga o tala e aumai e le failautusi aua ua leiloa poo le a le isi mea o le a ‘alo i ai i le mataga ua aliali.
