E lē o toe mamao ona tini lea i le aso ma le masina ua fuafuaina i le faigapalota a le atunuu, ae o loo fefulisai pea faalaau mamafa lagona ma manatu o tagata i se vaega faaupufai latou te taitaiina le malo, i se mea e maua ai le manuia lautele.
Ua tele foi ina amata ma faagaioi fono a vaega taitasi mo le mamalu o le atunuu poo fea o iai le tofa ma le utaga auā le faigapalota.
O le Aso Toonai ua mavae 26 o Iulai na amata ai galuega faatosina a le Labour i le itu i Sisifo o Aukilani. O le ofisa autu o le Labour i New Lynn na faataunuuina ai lenei faamoemoe.
Na auai uma sui tauva o le Labour o loo taufetuli i le itu i Sisifo; o se tasi o alo o le atunuu ia Lemalu Herman Retzlaff mai le itumalo o Upper Harbour, o le sui o Te Atatu o Twyford, o le isi foi alo o le atunuu ia Carmel Sepuloni o loo tamoe i le itumalo o Kelston, o se tasi o MP o Garvin Davis o le itumalo a Maori Te Tai Tokerau, faatasi ai ma Torie Hawdock o loo tauva faatasi ma le Palemia ia John Key.
O le toatele foi o tagata o le Pasefika ma sui o isi atunuu na auai uma i lenei tuufaatasiga, auā o le polokalame muamua lea ua mafai ona faatinoina i le itu i Sisifo o Aukilani, a o loma le faigapalota a le atunuu.
O le sini autu foi o le lolofi atu o tagata se‘i faalogologo poo le ā se saunoaga a le taitai o le Labour ia David Cunliffe e uiga i le latou pati pe a tulai mai e taitai le malo.
E tolu ni vaega na faamamafa i ai le tautalaga a le taitai ia David Cunliffe, (1) Galuega – na saunoa le taitai o le a latou siitia le totogi amata o tagata faigaluega i le $15.00 mai le $14 o loo iai nei. (2) Fale – o le a latou fausia ni fale e sili atu i le 100,000 i totonu o le atunuu aemaise lava i Aukilani, ona ua vaavaai latou i le toatele o ulugalii e toatele fanau ua nonofo i fale tailua potu. (3) Aiga – o le a faaitiitia le fuainumera o tamaiti aoga i totonu o vasega taitasi, ina ia faafaigofie ona faatino galuega a faiaoga i totonu o aoga.
Saunoa foi David Cunliffe e faigata i le faiaoga ona talanoa taitoatasi i tamaiti ona e fai si toatele. O le tāua foi o le tuu i lalo o tamaiti aoga i vasega taitasi o le a toe fausia ai nisi potu faaopoopo.
E 2,000 faiaoga o loo manaomia, $104miliona ua fuafua e faaalu i faiaoga fou ma le fausia o potu aoga fou, $100.00 e totogi i le tamaititi aoga e toatasi i le tausaga e aunoa ma le toe tapa o mātua i ni tupe mo mea e fai o le aoga.
O nei fuafuaga uma e sefulu tausaga e faatinoina ai pe a tulai mai le Labour i le faigamalo. O le a mafai foi ona sii i le 26 vaiaso e totogi e le malo i tina ma‘itaga.
Sui Pasefika o le a tauva mo le Vaega Faaupufai a le Labour
Mo le vaega faaupufai lava latou a le Labour, e toavalu 8 sui Pasefika o loo tauva mai ai, e toafā alii, toafā tamaitai.
O le a aofia ai le Tofa Su‘a William Sio (Magele), Jenny Salesa (Manukau i Sasa‘e), Carmel Sepuloni (Kelston), Kris Faafoi (Mana), Poto Williams (Kalaiesetete i Sasa‘e) Jerome Mika (Papakura), Lemalu Hermann Retzlaff (Upper Harbour) ma Anahila Suisuiki o loo tauva mai nofoa o le sui o le lisi.
E iai le talitonuga malosi, e toalima ni sui Pasefika o le Labour o le a manumalo mai nofoa o loo tauva ai. O itumalo faapalota o le a tauva mai a sui Pasefika o le Labour e aofia ai Aukilai, Ueligitone, ma Kalaiesetete. Ma o i latou nei o sui Samoa, Tonga, Atu Kuki ma le Tokelau.
