E toatolu sui o se aiga i le afioaga o Safotu i le itumalo o Gagaifomauga Numera Muamua poo le numera tasi foi i le motu i Salafai, o loo sauni uma e tauva i le palota laitiiti a lea itumalo i le aso 15 o le masina fou o Aukuso.
O le tofa Lavea Ieti ma le faletua le fetalaiga Faimalotoa Kolotita Stowers, o le a tauva mo le HRPP, ae o le tofa Lavea poo le afioga Peseta Lua Nafo‘i, o le a tauva mo le Itu agai le vaega faaupufai o le Tautua Samoa.
E lē o se mea e fou le taufetuli o ni sui e silia i le toalua mai se aiga i ni palota a le atunuu e saili ai tofi o itumalo i le Palemene auā o faiga filifiliga ua tuanai e aliali mai ai foi tulaga faapea ma o le itu mautinoa, o le aiā tatau saoloto lea i lalo o faiga faatemokarasi, peitai e feteenai tele ma a tatou tu ma aganuu pe a taatia atu i le va nonofo o matai ma o latou aiga. E ui ina faapea e toatolu sui o se aiga i Safotu o le a tauva i le palota laititi a Gagaifomauga Numera Muamua o loo loma nei, ae o le finagalo o le tofa Lavea Peseta Lua Nafo‘i ina ua fesiligia, e lē o tagata uma o lo latou aiga e lagolagoina le HRPP, ona o isi foi sui o loo lagolagoina le Tautua Samoa ma mafua ai ona mau pea lona lagona e tauva mo lea vaega faaupufai.
O ia o se tasi o sui faavae i le amataga o lea pati faaupufai ma ua faasee ese nei ma le tofi failautusi o le pati ona ua sauni i le palota laititi. O le faalauiloa o le sui tauva e toatasi mo le Tautua Samoa na faaalia ai e le taitai le afioga Palusalue Faapo II, o le taunuuga o le palota laitiiti a Gagaifomauga Numera Muamua, o le ata manino lea o le a iai le faaiuga o le palota tele i le 2016.
Peitai na fesiligia atili le taitai pe o le ā se silasila a le Tautua Samoa i le taunuuga o le palota laititi. Na tali Palusalue e manumalo le latou sui faatū ma o le manumalo foi lea o le vaega faaupufai i le palota tele lea ua toe o se tausaga ma ni masina ona oo atu lea i ai.
O le faatulai mai e le Malo i le taimi nei o le mau teuteuga i le Faavae aemaise le filifilia o le Ao o le Malo e manatu Palusalue, ua oia ai lagona o le atunuu, ma ua toatele ua lē toe lagolagoina le HRPP ona o ia teuteuga.
O le a tulimatai le taunuuga o le faiga filifiliga a Gagaifomauga Numera Muamua pe o le a taunuu valoaga ma talitonuga, auā o loo finau mai foi le taitai o le HRPP ma ona sui lagolago, e tumau lava le nofoa e tasi o le itumalo i le itu a le Malo.
