Tatala e Ausetalia avanoa i galuega faavaitaimi mo Samoa

Ua oo i Samoa le tufa ma le faasoa a Julia Gillard ma lona atunuu i Ausetalia, mo le aumaia o tagata e galulue i galuega faavaitaimi.
O se pepa o faamatalaga sa faamatuuina i le vaiaso talu ai, ina ua mae’a le fonotaga a taitai o le Pasefika sa usuia i Niu Sila, na manu a’e ai ma lea foi tala lelei mo Samoa ma ona tagata.
Sa faamaonia mai foi i se isi pepa o faamatalaga mai le sui sooupu sinia o le Matagaluega o Femalagaaina a Niu Sila, Angie Enoka, lea lava maliliega, e pei ona osia e taitai, poo Palemia o atunuu e lua, Samoa ma Ausetalia.
O Samoa, Nauru, Solomona ma Tuvalu, o nisi ia o atunuu o le Pasefika, ua tatala nei i ai e Ausetalia lea avanoa. O galuega i faatoaga ma le galueaina o le laueleele, o loo taulai i ai le valaaulia a Ausetalia, ma o loo manaomia ai le fesoasoani mai tagata atumotu.
O loo ta’ua i le pepa o faamatalaga, e faapea e ta’i ono masina o visa poo pemita, e mafai ona ofoina e Ausetalia e malaga atu ai le aufaigaluega, i lalo o la foi polokalame. O le umi foi lea, o le a mafai ai ona nonofo i latou o le a agavaa i lea maliliega mo galuega faavaitaimi.
Na ta’ua e le tamaitai Palemia o Ausetalia, Julia Gillard e faapea, e silia ma le lima selau avanoa faigaluega ua faamatuuina, ma o loo amata sailia ai ni tagata mo le taimi nei. O ia avanoa faigaluega, o le a faasafua ma tufatufaina i atunuu uma e pei ona faitauina i le polokalame ma maliliega ua mae’a sainia.
O se tulaga lelei ma le manuia lea faiga, auā o le a fesoasoani tele mo le toe atina’eina, ma le faaleleia o le tamaoaiga o atunuu laiti o le Pasefika, e pei ona ofoina i ai nei avanoa faigaluega. O le agaga moni lea ma le autū, e pei ona faamaonia ai e le Palemia o Ausetalia.
O le polokalame lenei o le Pacific Seasonal Worker Pilot Scheme a Ausetalia, sa amata mai i le tausaga talu ai 2010. O atunuu e pei o Tonga, Papua Nui Kini, Vanuatu, ma Kilipati, sa uluai ofoina i ai ia avanoa i le tausaga talu ai, ma o lea ua faaofi atu i ai, ma isi atunuu e iai ma Samoa.
O le manaomia tele o le malosi ma le numera o tagata faigaluega, ona o le faatupulaia foi o galuega i faatoaga ma laufanua, ua mafua ai ona toe tatala ma faalautele atu avanoa mo isi atunuu o le Pasefika, mai ia Julia Gillard ma lona atunuu.
O tagata Pasefika, o ni tagata galulue malosi tele, ma le lē faalogologo tiga i ia ituaiga galuega, o le isi mafuaaga lea o le aapa i ai o atunuu e pei o Niu Sila ma Ausetalia.
Ua tumuai tutusa ai nei ia atunuu e lua, i faiga faapaaga i maliliega faapitoa, mo le aumaia o tagata e galulue faavaitaimi, e fesoasoani ai i le tulaga tau tamaoaiga mo aiga, ae toe foi ai penefiti mo atunuu e lua sa osia le feagaiga.