Tumau le Tofiga Failautusi Aoao ia Tuiloma Neroni Slade

Ua faamaonia mai lipoti le toe filifilia o le sui o Samoa, le afioga ia Tuiloma Neroni Slade i le tofiga maualuga o le Failautusi Aoao mo le Fono a Taitai o le Pasefika, le Pacific www.savalinews.com/savali-forum/” \o “Forum” Forum.
O le afioga ia Tuiloma, sa tulai mai lea tofiga i le tolu tausaga talu ai, ma na ia faaalia lona agaga faafetai ia i latou uma na lagolagoina lona toe tulai mai lenei tofiga tāua mo le faafoeina o galuega a le Forum i le isi tolu tausaga o lumanai, aemaise lo latou talitonuina o lana galuega sa faia i le tolu tausaga ua mavae.
A o lei faamaonia mai lenei tofiga, sa iai nisi o fāfātala na sāua ai le ono faatulai mai o lē sa avea ma minisita o Mataupu Tau i le Va i Fafo a Fiti, le susuga Kalipate Tavola, e ala i se uunaiga a taitai mai le Atu Melanesia, ina ia aveesea ai le tofiga mai le sui o Samoa.
Peitai ane la, o lea ua toe mafuli finagalo o le toatele o sui o le Forum ina ia faatumauina le tofiga ia Tuiloma, e pei ona faaiu ai foi ma le Fono a Taitai o le Pasefika lea sa usuia i Aukilani i le vaiaso talu ai, e fesootai tonu i le taimi o le tatalaina o le Taamilosaga Lakapi mo le Ipu a le Lalolagi, 2011 o loo talimalo ai nei Niu Sila.
Na atili maualuga le tulai mai o le fonotaga a taitai o le Pasefika, i le auai mai o le Failautusi Aoao o Malo Aufaatasi, Ban Ki-Moon, le faauluuluga o le Iuni a Europa ma le Failautusi Aoao a Malo o le Taupulega.
Na uluai filifilia Tuiloma i lenei tofiga ta‘i tolu tausaga le umi, i le aso 20 Aukuso 2008.
Ae muamua atu mai le 1976-1982, sa galue ai Tuiloma e avea ma Loia Sili a le Malo o Samoa, ina uma mavae isi ona tofiga sa tautua ai, e pei o le Faufautua Faapalemene mo le Malo Samoa, o le Faufautua Autū i Mataupu tau le Tulafono (Principal/Legal Counsel), sa avea foi ma Loia Sinia i le Ofisa o le Loia Sili a le Malo Samoa.
O nisi o faailoga taualoa na tauaaoina i le afioga ia Tuiloma, e aofia ai le Order of Samoa (2005), Global Oceans Leadership Award (2003), Elisabeth Mann Borgese Medal for services to small island developing States and the oceans (2003) ma le Laureate, Elizabeth Haub Award for Environmental Diplomacy (2001).
O ia o le uluai Samoa mo le tofiga o le Loia Sili a le Malo, ma sa tautua foi o le taitaifono mo Alliance of Small Island States (1997-2003).
O le tofiga o le Failautusi Aoao o le Forum, e galue tuusa‘o ai o ia mo Taitai o le Forum ma le Komiti o Ofisa Sinia a le Forum (FOC). O ia foi o se sui tumau mo le fonotaga a Faalapotopotoga Faaitulagi o le Pasefika (CROP).