E lē toe tau faailoaina le tulaga o fatuga ma musika, aemiase lava o le siufofoga a le alii o Polu Paletaoga, ma le Nifoloa.
O loo molimauina i luga o le maketi ma faasalalauga i leitio ma tagata taitoatasi le manaomia ma le faatupulaia o le toatele e fiafia e faafofoga i musika ma le siufofoga o le alii pese. O le CD lona valu a le alii o Polu Paletaoga ua sauni nei e faalauiloaina faalauaitele i le faaiuga o le vaiaso nei. O le CD lona valu e pei ona fuafuaina mo le maketi, e 10 pese o loo iai.
O fatuga faaneionapo ma tau tulituliloa pea le gasologa o musika e fiafia i ai tupulaga ma le toatele, o loo taulai i ai le faamoemoe o le numera valu.
O le po o le Aso Faraile, aso 2 o le masina fou o Iulai, ua faamoemoe e faia ai se fiafia tele i le nofoaga tele a le Civic i Henderson, mo le faalauiloaina o le faamoemoe o Polu ma le Nifoloa.
O lea lava foi po o le a ulufale i le $25 mo soo se tasi, ae o le a mafai ona maua ai ma le CD, i le tupe lava lea e totogi mo le ulufale.
O loo faaigoaina le CD lona valu i le “Naunau i le Alofa”.
O se feiloaiga ma le susuga i le alii pese Polu Paletaoga, na faamatalaina ai ina ua fesiligia le mauaina foi o le taleni ma lona atina‘eina.
Sa ia ta‘ua o lona lava tamā sa fai ma vaaiga i lona soifuaga. Sa ia mautinoa foi, sa iai i lona tamā lea meaalofa o le pese, peitai sa leai se taimi e faatino ai ma taulai i ai lona finagalo.
Sa mua lava ona pisi i lana galuega o se faiaoga, ma sa faaalu ai foi le tele o ona taimi. O le ala foi lea sa manao ai lava ina ia mafai ona faaauau pea le isi taleni sa i lona tamā, e ui ina sa lē manatu mamafa i ai. O pese uma lava o le CD lona valu faatasi ai ma isi na muamua atu, sa tusia lava ma tuufaatasia e le alii o Polu.
O le tausaga e 2006 na uluai faalauiloa ai le vaega muamua, poo le uluai CD, ona lē toe faafofogaina lea o le Nifoloa, seia oo mai i le 2009, na toe tulai ai ma faaauau ai le taleni. E lua CD na faalauiloaina i Ausetalia e pei o le numera ono ma le fitu.O loo iai foi le fuafuaga a le alii pese, e fia malaga i Hastings mo se isi faalauiloaina e faia ai.
E lei mautu pe toe faia se isi i Aukilani pe a mae‘a Hastings. Saunoa le alii pese, afai ae taunuu lea fuafuaga, o le a faia i Otara a o lei toe foi i Samoa. O Polu ma lona aiga, Maliumai Paletaoga o loo faamautu i Tutuila, ma o loo malaga faatasi mai le alii pese ma lona toalua i Niu Sila i le taimi nei.
O le susuga ia Polu Paletaoga e mai le afioaga o Falelima ma Avao i Savaii, ae o lona aiga, Maliumai Paletaoga e mai Fagaloa i Upolu.
