O le autū ma le sini lea sa taulai i ai se polokalame sa tuufaatasia e le susuga i le Faafeagaiga o le Ekalesia Metotisi i Manukau ma le autalavou.
O le susuga ia Masunu T Utumapu sa ia faufau ma soosoo le auala laupapa ina ia fesootai ai le tāua o le gagana Samoa, ma aganuu faapea le Talalelei a le Atua o loo auauna ai ona tagata.
O se polokalame sa ta‘ua e le susuga i le Faafeagaiga, e ui sa faaaogāina ai lana autalavou, peitai sa fagatonu pea le malama i le feau tuusa‘o sa afiafi ai, i soo se tasi sa mafai ona maitauina ma silasila i ai i faiga sa faatinoina.
Sa taulai pea le agaga ma le sailiga malo mo tupulaga nei ma a taeao, i le talitonuga ia aua ne‘i motusia, pe vave ona sola ese ma mou atu le gagana ma aganuu mai o latou manatu ona o le lolofi mai o faiga faaonapo nei ma le talutalufou i taaviliga a le lalolagi.
O se feiloaiga ma le susuga i le Faafeagaiga Rev Masunu T Utumapu, sa ia faalauteleina ai i sona finagalo le tāua tele ma le anofale sa mafua ai ona tuufaatasia ma fuafuaina lea aso faapitoa.
E lē gata ina faatino ai nisi o aganuu ma le gagana e ala i vaaiga sa faatinoina, ae sa sili lava ona tatai pea finagalo ma loto o tagata i le autū sa faaautū i ai le faamoemoe o le autalavou.
O se fesootaiga tāua tele ma e tatau lava ona silafia ma manino lelei le sootaga o aganuu ma le gagana, ma le vaega a le Atua e ala i le Talalelei ua laulauvivilu ai le ‘au Kerisiano.
O lona finagalo, e tāua tele auā o le faasinomaga lea o le Samoa sa iai i le fuafuaga a le Atua i le amataga. O le gagana Samoa, o aganuu e matuā telē le fesootaiga, ma e lē tatau foi ona alualu mamao ese ma le faaaogāina o le Talalelei ma lona tilivaina.
E lua ‘au sa vaevaeina i ai le autalavou, ma o ia ‘au e lua sa tutusa foi vaega sa vaevaeina ai e agai i ai faatinoga uma sa manaomia e le polokalame.
O ia faatinoga uma lava, sa iai foi le komiti o faamasino latou te tagai toto‘a i ai, ma faia se faaiuga talafeagai mo le ‘au e lelei ma atoatoa le faatinoina o tulaga uma sa faapolokalameina.
O Fale Papa ma Malaefesilafai sa faaigoaina ai ‘au e lua e pei ona vaeluaina i ai le autalavou.
Polokalame Aso Toonai, 25 Iuni 2011
O le 1.45pm i le aoauli na amata ai i le solo a taavale teuteuina ma tausala. O le mae‘a ai o solo a taavale ma tausala, ona agai lea i totonu o le hall mo le amataina aloaia i le sauniga sa taitaia e le afioga i le Sea o le Matagaluega a Niu Sila i Matu, le susuga ia Logo Ofe.
O le folasaga amata, ma le toe faamaninoina o le faamoemoe o le autalavou, sa fofogaina lava e le susuga ia Masunu T Utumapu. O lea foi folasaga sa saunoa ai le faafeagaiga i le tāua tele o le faasinomaga e pei ona autū i ai le aso faapitoa o le autalavou.
O le ‘Ava o le feiloaiga, sa malaga le autalavou a Lufilufi, ae faatali Malaefesilafai i Manukau.
O le paluina o le ‘ava sa feagai ma Taupou Fale Papa. Ona sosoo ai lea ma le folafolaina o faaaloaloga sa nafa foi ma Fale Papa. Sa aofia ai Fono o le Ava, Malu o le Taeao, ma le Sua a le Malaga.
O nisi o vaega sa faatinoina e aofia ai Solo, sa faatatau i se autū e faaupuina faapea, E fai foi lou la goto, ma amataga o lou la oso.
O fatufatuga o lagona ma taga, o tausala ma taleni, o pese taitoatasi, faaevagelia, o puletasi ma fesili ma tali. O tala faa-Samoa ae faaiu i taualuga.
O vaega tāua uma ia sa taulai i ai le silasila a faamasino mo le tuufaatasia o togi e ono manumalo ai se ‘au e lilifa i ai le faaiuga a faamasino.
Ae ui ina o se faiga faatauvaga, peitai o le finagalo o le susuga ia Masunu, o le malamalama lelei, ma manino o le tupulaga i le uiga moni ma faiga sa faatinoina mo le auga sa faamoemoe i ai le polokalame, o lona tāua lava lea.
O mea uma sa fuafuaina sa faavae lava ina ia maua le sini, ma ia fesootai lelei ma le autū ma le agaga maualuga o le oso ma le ‘ai lelei lea mo alo ma fanau aemaise lava o tupulaga talavou.
Sa iai nisi o kamupani ma pisinisi sa lagolagoina lea faamoemoe, e tauala i seleni sa foaia, o laei ma le tele lava o isi fesoasoani e ala i auaunaga faatino, sa fesoasoani malosi mo le faataunuuina o le faamoemoe.
O le mae‘a ai o le faamoemoe sa tuupoina ma ona vaega lautogia mo ‘au e lua sa vaevaeina i ai, ona alo ai lea i le taumafataga tele sa saunia mo faamasino e toafā sa faatautaia le galuega, aemaise uo ma aumea mamae a le ekalesia sa faatulagaina lea fuafuaga tāua.
O le vaiaso nei ua fuafua le faafeagaiga ma le faletua, faapea le usugafono a Manukau e malaga ai i Samoa mo le fono tele a le ekalesia aoao, e pei ona faatulagaina i tausaga taitasi.
