E na o le iva aso ua tatala atu e le matagaluega a le Palemia ma le kapeneta i le atunuu e lesitala ai i latou e fia maua ni avanoa faigaluega faavaitaimi i Ausetalia faapea ma Niu Sila e pei ona amata tatala i le asō ona faamauina faamatalaga uma o tagata e fia maua ia avanoa faigaluega.
I se faasilasilaga mai le matagaluega a le Palemia ma le kapeneta o loo faaalia ai e tapunia le lesitala i le aso 20 o le masina nei lava. Ua leva ona faatalitali le toatele o alii ma tamaitai talavou o loo fia maua ni galuega faavaitaimi i faatoaga ma le atinae o tagata tafafao i Ausetalia poo afea e amata ai ona tapa lesitala mo galuega faavaitaimi i lea atunuu ona e lelei le totogi toe maualuga le aoga o le tupe a lea atunuu pe a faaliliu i tupe Samoa lea e faaluaina e pei o le tala meleke poo le tupe Amelika.
O lea faatoa amata faagasolo le lesitala mo ia galuega i Ausetalia, i le tuanai o masina o alu lipoti ma faasalalauga a se isi ofisa malaga ma ta‘ua ai ua amata faagaioi e lea ofisa ia avanoa faigaluega.
O le itu mautinoa o le a matua tumutumu le ofisa o le matagaluega a le Palemia ma le kapeneta i le toatele o le a saili ni galuega i lea polokalame.
