Ta‘i 6 tausaga i le falepuipui ona o faatoaga maruana

O Fepuari o le tausaga na tea nei na osofai ai e leoleo le fale o se aiga i Tiavi ona o masalosaloga o loo natia ai faiga solitulafono e fesootai ma le faafaileleina o le laau faasaina o le maruana.

O se osofaiga na molia ai ni alii se toalua, o Peti Okesene ma Vaalele Lesa, mai nuu o Vailele ma Ulutogia i Aleipata ma molia faatasi ai i moliaga o le toto ma le umia o laau faasaina. Sa tetee uma nei alii i moliaga a leoleo ae peitai na oo mai i le masina o Mati o le tausaga nei o le a amata ona valaau molimau, ae suia le la tali i le ioe i moliaga uma.

O le lipoti a le ofisa faanofo vaavaaia le Probation office na tautino ai le alii o Vaalele Lesa ua 30 tausaga o lona matua e faapea, o ia na amata ona ia faafailele ma toto le laau maruana i le tausaga e 2005 e pei ona iai ma lana faatoaga maruana i Tiavi. Na ia faailoa foi i le ofisa faanofo vaavaaia o ia sa molia muamua i moliaga e fesootai ma fualaau ma laau faasaina (narcotics).

Peitai ina ua silasila le faamasinoga i le pepa o loo iai faamaumauga a leoleo o solitulafono mo lea taulealea, na maua ane ai e na o le tasi lava le moliaga o loo iai ua na o le gaoi.

Sa talitonuina e le faamasinoga le faamatalaga a Vaalele e tusa ai o ona moliaga muamua o laau faasaina e ui ina leai se faamaumauga i le pepa o faamaumauga a leoleo.

O Peti Okesene 39 tausaga lona matua, e leai ni ona moliaga muamua tau laau faasaina ae na o moliaga e sefulu sa tulai muamua ai i le faamasinoga faaitumalo ae leai se fesootaiga ma solitulafono tau fualaau ma laau faasaina.

O lenei taulealea e galue i le faatoaga a lona aiga i Tiavi, ma o se faatoaga e atinae ai laau tau faatoaga eseese ma fualaau faisua ma fualaau taumafa mata poo vegetables.

O le mau a leoleo na folasia i le faamasinoga sa ta‘ua ai e faapea sa iai moliaga o fualaau faasaina sa molia muamua ai Peti, peitai e avatu le pepa a leoleo o loo faamaumau ai solitulafono e leai ni moliaga faapea.

O le Aso Toonai, 19 o Fepuari 2011 na faatino ai le osofaiga poo le raid a leoleo lea e faapea e taunuu atu i le fanua o le aiga ae sola le alii o Vaalele.

Na faataalise atu leoleo na auai i le osofaiga ma toe pue ma maua ma ave uma i laua i le ofisa o leoleo. O sailiga a leoleo na maua ai i le fale se laau maruana e tusa lona umi ma le 2 futu ma le 31 inisi o loo ola i totonu o se ulo fai meaai. O se isi laau maruana ua 3 futu 40 inisi lona umi o loo ola i se pakete.

Na maua ai ni tagapepa se tolu o loo fafao ai ni laau laiti, ae sefulutasi tamai laau maruana o loo faaola i ni atigi paelo uga se valu.

E tasi se isi laau o loo i totonu o se pesini, tasi se isi laau o loo i totonu o atigiapa o loo tusi ai faaupuga i se pepa (label) i le “Blueskies”.

Lua laau o loo ola i se atigi paelo, lua laau laiti o loo ola i se atigi fagu pa‘u ua vaelua, sefuluono i ai laau maruana laiti o loo faaola i totonu o se faatafafā lanu mumu.

O le aofaiga uma o laau maruana na maua e 47 ae 1,140 fatu o le laau faasaina, ma le fa lala laau faasaina ua mamago o latou lau. O le faaiuga a le faamasinoga mo nei alii na silasila ai i le toe faaopoopoina o tausaga o faasalaga mo lenei solitulafono lea sa fitu ae ua siitia i le 14.

Peitai na saunoa manino le faamasino sili i le fai fuafua o le galuega a le faamasinoga i le tuuina atu o faasalaga mo lenei solitulafono, ona e le faaitiitia ai solitulafono tau fualaau ma laau faasaina pe a maualuga le faasalaga falepuipui. O le fua a le faamasinoga e ave ai le faamuamua i le fua faatatau e fetaui ma le faatinoina o le solitulafono lenei.

E ta‘i ono tausaga ua nofosala ai i laua i le falepuipui ma o masina ma aso sa nofo taofia ai i le vaaiga a leoleo e tatau ona toesea mai le aofaiga o tausaga o lo la faasalaga.

O le Aso Lua, 10 o Aperila na faia ai le faaiuga mo Peti Okesene ma Vaalele Lesa.