Na matuai faatumulia le pitonuu o Inala i le tuatusi 39 Lavender Street i le lolofi atu o le mamalu o le atunuu e sapaia le faamanuiaga i taumafa pa‘ū ma le taugofie a le Paradise Taste i le taimi na uluai tatalaina ai ma faatau ana taumafa felanulanuai i le Aso Toonai aso 14 o Iulai. O le auaunaga a le Paradise Taste o se lālā na fofoa mai i le Paradise Catering o loo lauiloa ai i Aukilani pei ona saunoa le alii pule.
O loo faatautaia lenei tautua i Brisbane nei e le susuga ia Tui Alatina Vaimoso (Vaimoso, Faleapuna & Faala Palauli) ae o le faletua ia Rachael e mai Vaisala ma Salani Falealili.
Na faalauiloa i luga o le leitio le tele o latou taumafa pa‘ū ma faapea ona tusia ai suafa uma o i latou na auai i le tatalaina i le Aso Toonai ma le Aso Sa auā se faailoga e manumalo ai i se manufata atoa.
Na faamanuiaina ai le faletua ia Susana Fonoti ma manumalo ai i le manufata lapoa lava sa faimeaalofa ai le alii pule ma le faletua e ala i le lagolago atu ma faatau taumafa a le Paradise Taste.
E leai ni tagata ese o galulue ua na o le alii pule lava ia Tui ma le faletua ia Rachael faapea le nofoaalo.
O taimi o loo tatala ai lenei auaunaga: Aso Lua & Aso Lulu: 8am – 5pm i le afiafi; Aso Tofi & Aso Faraile 8am – 8pm; Aso Toonai 8am – 6pm; Aso Sa 8am – 5pm ae tapunia i le Aso Gafua.
O le Paradise Taste o loo maua i le Tuatusi: 39 Lavender Street INALA, ma e mafai ona foi ona faafesootai i le Telefoni: 0431 744 408.
