“Na suesue uma ana paaga o tamaitai ae leai se isi o maua ai”…sui o le AIDS Foundation
O se suesuega a le Matagaluega o le soifua maloloina i le mafuaaga tonu na maua ai se alii talavou i le faamai oti o le HIVAIDS lea na iu ina maliu ai lava i le tausaga ua mavae, e oo mai i le taimi nei e le o iloa se taunuuga o lea sailiiliga.
O lē ua maliu sa galue o se ave taavale laititi laupasese. Ua faaipoipo ma ua iai lana fanau. Ina ua aafia lea alii talavou sa faia suesuega masani faafomai aemaise le vaega e nafa ma le HIVAIDS i le matagaluega o le soifua maloloina.
O se molimau faatuatuaina o se sui mai le faalapotopotoga o le AIDS foundation i Samoa na ia faaalia e faapea, sa suesueina uma tamaitai sa fai paaga ma lē ua maliu, ae peitai o le taunuuga o ia suesuega e lei faamaonia ai o aafia se isi o ia tamaitai e toafā.
“O le mafuaaga lena na faaauau ai pea le suesuega ma e lei maua mai lava se taunuuga”, na saunoa ai lea sui o le AIDS Foundation.
Faaalia e le sui a o soifua lea alii talavou, sa ia faailoa atu e iai lona masalosaloga o sana pe‘a (tattoo) sa ta i se vaega o lona tino e masalosalo na mafua ai ona aafia. E le o faailoaina mai e lea sui le fale tape‘a na ta ai le pe‘a a le alii talavou.
“O lana tala lena ina ua matou talanoa ae o le faalavelave e le o mautinoa tonu foi lena tulaga”.
Na fesiligia le alii fomai le tofa Leausa Dr Take Naseri, i se taunuuga o le suesuega ae na ia faailoa mai o loo malaga i Solomona i le faaaliga o tu ma aganuu a le Pasefika le alii fomai na faia le suesuega, pau lea o le tagata e maua ai se tala atoa o lea lipoti.
O le toalua o le alii talavou o loo soifua pea ua aafia foi i siama o le gasegase, ma na uma ai foi le ola o se tasi o le la fanau, le pepe na maua i le taimi ua aafia uma le ulugalii i le HIVAIDS.
O se lipoti lata mai i ni suesuega a se komisi a Malo Aufaatasi sa silasila ai i tulafono a atunuu o loo fai ma mafuaaga o le tuai logosaia e tagata o auala o puipuiga mai feusuaiga lē talafeagai e ono aafia ai i le gasegase, o loo fautuaina ai Malo o loo iai pea tulafono faailoga tagata ina ia aveesea.
O Samoa le isi atunuu o loo tutumau pea i le faaaogā o tulafono mai taimi o pulega faakolone o loo tuuaia o le faapogai lea o le sosolo o le faamai oti.
O Samoa o loo faatumau pea le solitulafono o le faasotoma ma le mulilua, faapea le faasā ma tapu ni alii ona laei e faafoliga o ni tamaitai. O le fautuaga a le Komisi o le Toe fuataina o tulafono na ave i le Kapeneta e soloia le faasotoma ma le mulilua na teena.
O le faaiuga e mafua ona o Samoa e faavae i aoaoga faa-Kerisiano ma o se tasi lea o agasala pito matuia o loo faamamafa i aoaoga faakerisiano.
O le tulafono o loo faasā ai alii ona laei e foliga o ni tamaitai, ua talia e le Malo le soloia ese ma tusi tulafono o moliaga e ono faasalaina i le falepuipui.
